Хитай һөкүмити уйғур диярида йеқинқи 4 йил йил ичидә 5 милйондәк деһқан-чарвичини көчүргән

Мухбиримиз әркин
2020-10-02
Share

Хитай һөкүмити уйғур диярида йеқинқи 4 йил ичидә 5 милйонға йеқин деһқан-чарвичини йөткәп, «бихәтәр өйләр» гә көчүргән. «Шинҗаң гезити» ниң 2-өктәбир тарқатқан хәвиридә, буниң 1 милйон 118 миң 770 аилә икәнлики, униң «13-бәш йиллиқ пилан» мәзгилидә иҗра қилинғанлиқи илгири сүрүлгән. Хәвәрдә ашкарилишичә, бу аһалиләрниң мутләқ көпчилики 2016-, 2017-вә 2018-йиллирида көчүрүлгән. Бу хитайниң уйғур диярида чоң тутқунни башлап, уйғурларни кәң көләмлик лагер вә түрмиләргә қамиған мәзгилгә тоғра келиду.

Хитай һөкүмити йәрлик деһқан-чарвичиларниң «тағлиқ вә чөллүк ичидә әвлатму-әвлат яшап кәлгән йәр тәврәшкә чидамсиз топа өйләрни терик етип, бетон қурулмилиқ йеңи өйләргә көчкәнлики» ни илгири сүрсиму, лекин көзәткүчиләр хитайниң бу арқилиқ уйғурларниң әнәниви яшаш усули, мәһәллә мәдәнийитини вәйран қилип, уларни техиму қаттиқ контрол астиға алғанлиқи, бу қурулушниң уйғур «мәдәнийәт қирғинчилиқи» ниң бир парчиси икәнликини илгири сүрүп кәлди.

«Шинҗаң гезити» ниң хәвиридә тәкитлишичә, деһқан-чарвичиларни йөткәш қурулуши «йеңи вәзийәттики шинҗаңда иҗтимаий муқимлиқ, узун муддәтлик әминлик нишанини илгири сүрүшниң асаслиқ тәдбири» икән. Бу мәзгил ичидә көчүрүлгән деһқан-чарвичи аилилириниң йеримини җәнубтики үч вилайәт бир областикиләр игилигән. «Шинҗаң гезити» ниң хәвиридә тәктилишичә, юқириқи үч вилайәт бир областтин 580 миң 490 аилә деһқан-чарвичи көчүрүлгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.