Хитай һөкүмити уйғур деһқан аилилириниң өй безәш әнәнилирини өзгәртишкә 4 милярд йүән хәҗлигән

Мухбиримиз әркин
2019-10-21
Елхәт
Пикир
Share
Принт

Хитай һөкүмитиниң уйғур деһқанлирини әнәниви турмуш муһити, миллий пасондики өй ясаш, безәкчилик адәтлирини өзгәртип, өйләрни хитай пасонида ясаш, өй ичини хитай пасонида безәшкә мәҗбурлаватқанлиқи мәлум болмақта. Хитай таратқулириниң илгири сүрүшичә, уйғур аптоном райони 2018‏-йилиниң өзидә деһқанларниң йәр тәврәшкә чидамлиқ өйләргә көчүп, «анәнивий өй тутуш адәтлири» ни ташлиши, супилиқ өйләрни чувуп, карват, сафаларда яшаштәк «заманивий турмуш адәтлири» гә көчүшигә 4 милярд 196 милйон йүән сәрп қилған.

Хитай һөкүмити 2017‏-йилидин башлап уйғурларни кәң көләмлик тутқун қилип, 2 милйондәк уйғур вә башқа мусулманларни йиғивелиш лагерлириға қамаш билән бир вақитта, миллий пасондики қурулушларни, миллий пасонида безәлгән өйләрни «радикаллиқниң ипадиси» дегән сәвәб билән чеқишқа башлиғаниди. Көзәткүчиләр хитайниң бу һәрикәт арқилиқ уйғурларниң турмуш вә күндилик һаятидики миллий хаслиқни өчүрүп ташлап, уларниң уйғур мәдәнийитини йорутушқа урунуватқанлиқини илгири сүрмәктә.

Хитай шинхуа агентлиқиниң 21‏-өктәбир тартқатқан бу һәқтики бир хәвиридә, маралбеши наһийәсиниң анаркөл йезисигә қарашлиқ чүшүргә кәнтидики деһқанларниң әһвали тонуштурулуп, һазир бу кәнттики деһқанларниң бурунқи әнәнивий һойла-арам қияпити вә өй безәш адәтлиридә пүтүнләй өзгириш болғанлиқи, деһқанларниң супилиқ өйләрни бузуп, бурунқи өй ясаш адәтлирини, кигиз селинған йәрдә йетиштәк «сағлам болмиған» турмуш усуллирини ташлиғанлиқи, кигизниң орнини софа вә карват игиллигәнлики, деһқанларниң йәр тәврәшкә чидамлиқ өйдә олтуралмаслиқ, қишниң күни иссиналмаслиқтәк әһвалға хатимә берилип, деһқанларниң «шәһәрликтәк» яшаватқанлиқи тәкитләнгән. Хәвәрдә илгири сүрүлишичә, «бу йолда елинған мислисиз тәдбирләр җәнубий шинҗаңдики йеза-кәнтләрниң олтурақ муһитини үнүмлүк өзгәртип, таримдики йеза-кәнтләр йеңи қияпәткә киргән. Бу йәрдики деһқан-чарвичилар заманиви турмуш усулиға тәдриҗий көнүшкә башлимақта» икән.

Пикирләр (0)
Share
Толуқ бәт