Xitayning dunya sehiye teshkilatigha qilghan tajsiman wirus bilen küresh qilish i'anisi üch pirsentkimu yetmigenliki tenqidke uchridi

Muxbirimiz irade
2020-03-26
Élxet
Pikir
Share
Print

Dunya sehiye teshkilati yéqinda dunyagha zor tehdit peyda qiliwatqan korona, yeni tajsiman wirus bilen küresh qilish xizmetliri üchün i'ane toplash herikiti bashlighan bolup, heriketke bina'en herqaysi dölet hökümetliri oxshimighan miqdarlarda maliye yardimi qilghan. Halbuki, hazirghiche 675 milyon dollar yighilghan bu herikette xitayning i'ane sommisi 3 pirsentkimu yetmigen iken.

"Nyu-york pochtisi" ning bu heqtiki xewiride körsitilishiche, bu hal, amérikadiki bir qisim siyasetchilerning küchlük tenqidige uchrighan. Ular sözide xitayning bu dunyawi palaketning jawabkari ikenlikini eskertip, xitayning tajsiman wirus bilen küresh qilishqa herqandaq dölettinmu köp i'ane qilishi kéreklikini otturigha qoyghan.

Xewerde éytilishiche, dunya sehiye teshkilatining bu qétimliq i'ane herikitige xitay hökümiti aran 20 milyon dollar i'ane qilghan. Halbuki, yaponiye 47 yérim milyon dollar, kuweyt 40 milyon dollar, gérmaniye 28 milyon dollar i'ane qilghaniken. Tramp hökümiti ichidiki ismini ashkarilimighan melum bir emeldar "Nyu-york pochtisi" ge qilghan sözide xitayni eyiblep "Tarqilishchan késelni bashlighan xitay aran 20 milyon dollar meblegh saldi. Xitayning pixsiqliqi heyran qalarliq we nomussizliqtur. Ular héch bolmighanda 675 milyon dollarning kem dégende yérimini tölishi kérek idi" dégen.

Xewerde éytilishiche, dunya sehiye teshkilatining tajsiman wirusi bilen küresh qilish i'ane herikitige bu nöwet amérika hökümiti 14 milyon 700 ming dollar i'ane qilghan bolsimu, emma amérika tashqi ishlar ministirliqi bu yil 2-ayda amérikaning xelq'araliq tajsiman wirustin qutquzush herikitige 100 milyon dollar meblegh ajritidighanliqini élan qilghanidi. Uning üstige, amérika hökümiti dunya sehiye teshkilatigha her yili 58 milyard dollar i'ane qilidighan bolup, bu reqemmu xitay dunya sehiye teshkilatigha yilda i'ane qilidighan 28 milyard 700 milyon dollardin bir hesse köp iken.

Toluq bet