Uyghurlar istanbuldiki xitay konsulxanisining iftarliq pa'aliyitige naraziliq bildürdi

4-Iyun istanbulda yashawatqan Uyghurlardin er-ayallardin terkib tapqan bir guruppa kishiler, bu jaydiki xitay konsulxanisining Uyghur oqughuchilargha iptar programmisi uyushturghanliqigha qarshi naraziliq namayishi ötküzdi. Bu pa'aliyet ijtima'iy taratqulardimu keng tarqitildi.

Istanbuldiki beshiktash yénida qollirida ay yultuzluq kök bayraqlar bilen toplan'ghan Uyghurlar, “Xitay sherqiy türkistanda roza tutushni cheklewatidu türkiyede iptar bériwatidu”, dégen chong xetler yézilghan wiwiskilarni kötürüp xitaygha qarshi sho'arlar towlashti.
Igileshlerge qarighanda, bu naraziliq pa'aliyitini türkiyediki sherqiy türkistan medeniyet we hemkarliq jem'iyiti qatarliq teshkilatlar, jama'et wekilliri qatarliqlar uyushturghan.

Inkaslardin melum bolushiche, zor sandiki Uyghurlar öz wetinide atalmish “Terbiyelesh lagérliri” dep atalghan yighiwélish lagérlirigha solan'ghan, Uyghurlarning ramizan ötküzüshi we bashqa erkin diniy pa'aliyetliri cheklen'gen ehwal astida türkiyediki xitay diplomatiye organlirining ilgiri-kéyin enqere we istanbulda Uyghur oqughuchilarni teklip qilip iftarliq pa'aliyiti uyushturushi türkiyediki Uyghur jama'iti we bir qisim türklerning naraziliqini qozghighan.

Namayish jeryanida bir qisim Uyghur pa'aliyetchiler söz qilip, xitayning Uyghurlar üstidin yürgüzüwatqan zulumining chékidin éship ketkenlikini eyibligen we istanbuldiki xitay konsulxanisining bu xil iptarliq pa'aliyitini “Köz boyamchiliq” déyishken. Namayishchilar shu küni erzan oqulushi bilen teng namayish qiliwatqan déngiz boyidiki neq meydanda olturup iptar qilishqan.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar