Li kéchyang xitayning iqtisadiy sahede dawalghushqa duch kéliwatqanliqini étirap qildi

Muxbirimiz shöhret hoshur
2018-09-19
Élxet
Pikir
Share
Print

Xitay bash ministiri li kéchyang xitayning nöwette iqtisadiy sahede dawalghushqa duch kéliwatqanliqini tilgha alghan.

U bu sözlerni bügün yeni 19-séntebir küni tyenjinde échilghan dunya iqtisad munbiri yighinida otturigha qoyghan.

U sözide xitay iqtisadi dunya iqtisadiy bilen köp jehettin bir-birige baghlinishliq bolghachqa, dunyaning iqtisadiy weziyitide yüz bériwatqan özgirishlerning tesirige uchrimay qalmaydighanliqini ilgiri sürgen. U yene mushu sewebtin xitaydiki iqtisadiy tereqqiyatni muqim sür'ette élip méngishta bir qatar zor qiyinchiliqlargha duch kéliwatqanliqini étirap qilghan.

Amérikining CNBC téléwiziyesining bügünki bu heqtiki xewiride eskertilishiche, xitayning memliketlik iqtisadiy bixeterlik komitétining emeldarliridin fang shingxey shu yighinda seyshenbe küni qilghan sözide amérikining iqtisadiy tedbirlirining xitaygha tesir körsitelmeydighanliqini bayan qilghan iken.

Xewerdin melum bolushiche, xitay bash ministiri li kéchyang bügünki sözide xitayning iqtisadiy jehettiki dawalghush alametlirini étirap qilghan bolsimu, emma arqidin yene xitayning bu dawalghushtin rahetsiz emeslikini, xitayning yüz bergüsi her xil éhtimalliqlargha qarita teyyarliq tedbirliri barliqini bayan qilghan.

Xelq'ara xewerlerde déyilishiche, amérika prézidénti donald tramp aldinqi küni xitayning 200 milyard dollar qimmitidiki méligha qoyulidighan chégra béjini östüridighanliqini élan qilghandin kéyin, xitay terep buninggha jawaben amérikining 60 milyard dollarliq méligha chégra béjini östüridighanliqini élan qilghan.

Toluq bet