Xitaydiki chet'el meblighi 2015-yilidin buyanqi eng töwen sewiyege chüshüp qalghan

“Pul-mu'amile waqit géziti” ning xewer qilishiche, xitaydiki chet'el meblighi 2015-yilidin buyanqi eng töwen sewiyege chüshüp qalghan.

“Pul-mu'amile waqit géziti” (Financial Times) ning xongkong pay chékidiki sanliq melumatlarni analiz qilishiche, bu yil chet'ellik meblegh salghuchilarning xitayning péyigha salghan sap meblighi %87 töwenlep, 30 milyard 700 milyon yüen'ge chüshüp qalghan. Démekki, 2023-yili chet'ellik meblegh salghuchilar texminen 29 milyard dollarni xitay pay baziridin chiqiriwalghan.

Xewerde déyilishiche, meblegh salghuchilarning chékinip chiqishigha asasliqi xitayning öy-mülük sahesidiki kirizis, zor qerz, töwen istémal telipi we qattiq kowid yuqumidin kéyinki iqtisadini eslige keltürüp bolalmasliqidek amillar seweb bolghan iken. Bolupmu xitayning eng chong öy-mülük zerdarlirining biri bolghan “Dölet baghchisi” guruhining bu yil awghustta banka qerzini töliyelmesliki kirizisning intayin chongqurluqini ashkarilap qoyghan bolup, mana bu weqedin kéyin chet'ellik meblegh salghuchilar xitaydiki paylirini köplep sétishqa bashlighan.

Buningda yene, xitayning kéyinki yillarda chet'el shirketlirige qilghan zomigerlik siyasetliriningmu türtkisi bolghan iken.

Melum bolushiche, 29-dékabir jüme küni yene, xitay hökümiti tijariy saheni kontrol qilidighan téximu qattiq qa'idilerni élan qilghan bolup, bumu öz nöwitide yene nurghun kishilerning xitayning téngshün, NetEase we Bilibili qatarliq shirketliridiki paylirini sétiwétishige, netijide bu shirketlerning pay chékining chüshüp kétishige seweb bolghan.