Хитай иқтисадидики чөкүшниң 2024-йилиму давам қилидиғанлиқи мөлчәрләнмәктә

Вашингтондин мухбиримиз ирадә тәйярлиди
2023.12.28

Мутәхәссисләр хитай иқтисадидики чөкүшниң 2024-йилиму давам қилидиғанлиқини билдүргән. С н н телевизийәсиниң бу һәқтики хәвиридә дейилишичә, “ 2023-йили хитай өз иқтисадини оңлап, йәр шари тәрәққиятиниң муназирә тәләп қилмайдиған мотори болуштәк ролини әслигә кәлтүрүшни үмид қилған болсиму, әксичә у хәлқара пул фонди тәшкилати (IMF) тәрипидин дуня мәһсулат миқдарини ‛кәйнигә сөрәватиду‚ дәп атилидиған дәриҗигә чүшүп қалған” икән.

Хитайдики өй - мүлүк киризиси, истемалниң төвәнлиши вә яшларниң ишсизлиқ нисбити қатарлиқ мәсилиләр түпәйлидин иқтисадшунаслар хитайниң бу йиллиқ иқтисадиниң ешиш нисбитиниң йәнила ковид юқумидин илгирики мәзгилигә қайталмайдиғанлиқини мөлчәрлигән. Улар хитайниң 2024-йилидики иқтисадий тәрәққият әһвалидинму яхши хәвәр йоқлиғини, униң бундин кейинки нәччә он йилда өз җайида тохтап қелиши мумкинликини мөлчәрлигән.

С н н ниң дейишичә, бу иқтисадшунаслар “оттуричә кирим тузиқи” дәп атайдиған йәни йеңидин гүллиниватқан иқтисадий гәвдиләр намратлиқтин тез тәрәққий қилип, юқири киримлик орунға еришиштин бурунла өз җайида қапсилип қалидиған әһвалға йолуқидикән.

Блумберг хәвәрләр ториниң бүгүнки хәвиридә дейилишичә, америкадики голдман сакс гуруһи, морган стәнлей вә UBS гуруһи қатарлиқ 10 мәбләғ селиш банкиси вә аксийә васитичисиниң хитай һәққидики ортақ тонуши болса хитайниң өй-мүлүк саһәсидики касатчилиқниң 2024-йилиму давамлишидиғанлиқи, иқтисадниң ешишиниң астилайдиғанлиқи, һөкүмәтниң бу саһәни муқимлаштуруш тиришчанлиқиниң касатчилиқни әслигә кәлтүрүшкә йәтмәйдиғанлиқидин ибарәт икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.