Xitay taratquliri amérika bilen iran otturisidiki sürkilishte iran'gha yel bermekte

Muxbirimiz qutlan
2017-09-23
Share

Koréye yérim arilining weziyiti künsayin jiddiylishiwatqan, amérika bilen shimaliy koréye otturisidiki tehdit xaraktérlik "Til urushi" yuqiri pellige kötürülgen bir mezgilde amérika bilen iran otturisidiki sürkilishlerning yenimu küchiyiwatqanliqi bilinmekte.

Roytérs agéntliqining xewirige qarighanda, 19-séntebir künidiki birleshken döletler teshkilatining omumiy yighinida amérika prézidénti donald tramp iranni qattiq eyibligen. U, iran nahayiti "Xeterlik" bolghan bashqurulidighan bomba qurulushini dawamlashturmaqta hemde uni yemen, süriye we rayondiki bashqa döletlerge éksport qilmaqta, dégen.

Shu küni iranning eng aliy diniy dahiysi ayetulla éli haminiy trampning sözige inkas qayturup mundaq dégen: "Iran bésim aldida hergiz bash egmeydu. Eger amérika iran yadro kélishimige qarita herqandaq 'xata heriket' qollansa, iran hökümiti buninggha küchlük inkas qayturidu."

Iran prézidénti héssen rohaniy 22-séntebir küni téhranda ötküzülgen herbiy paratta söz qilip, eger zörür tépilsa iran armiyisining türlük qisimlirigha téximu köp bashqurulidighan bomba sepleydighanliqini bildürgen. U, "Iran özining bashqurulidighan bomba qurulushini élip bérishta bashqa bir dölettin ijazet sorimaydu," dégen.

Amérika bilen iran otturisidiki yadro mesilisini özek qilghan sürkilishler küchiyishke bashlighan peytte xitay hökümet taratquliri iran'gha yel bérip, amérikini eyibligen. Shinxwa tori 19-séntebir küni maqale élan qilip, "Tramp wezipige olturghandin buyan, iranning bashqurulidighan bomba qoyup bérishte ching turghanliqini bahane qilip iran'gha üzlüksiz bésim ishletti. Iran'gha qaritilghan jaza mudditini uzartti shundaqla iran puqralirining amérikigha kirishini cheklidi," dégen. 

Közetküchiler, xitay hökümet taratqulirining amérika bilen iran otturisidiki bu qétimliq sürkilishtin paydilinip, iran terepke dawamliq yel bériwatqanliqini ilgiri sürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.