Xitaygha jasusluq qilghan amérikadiki xitay inzhénér 8 yilliq késilgen

Xitay da'iriliri üchün jasusluq qilghan amérikadiki xitay inzhénér ji chawchün 8 yilliq qamaq jazasigha höküm qilin'ghan.

“Jenubiy xitay etigenlik géziti” ning xewer qilishiche, ji chawchün 2013-yili oqughuchiliq wizisi bilen amérikagha kelgen we bu yerde armiyege qatnashqan. U bu jeryanda xitayning jyangsu ölkilik dölet xewpsizliki nazariti üchün ishlep, ularning özige xizmet qilduridighan bir qisim amérikaliq alim we inzhénérlarni éniqlap chiqishigha yardem bergen.

Melum bolushiche, jyangsu ölkilik dölet xewpsizliki nazariti amérikaning sana'et we soda mexpiyetlikini qanunsiz qolgha keltürüsh üchün nurghun pilanlargha qatnashqan bolup, u xitayning muhim istixbarat organlirining biri iken.

Ji chawchün 2018-yili 9-ayda qolgha élin'ghuche bolghan ariliqta, xitay istixbaratini sekkiz kishining terjimihali bilen teminligen, ularning hemmisi esli xitay yaki teywendin kelgen we yaki kéyin amérika puqraliqigha ötken kishiler iken. Bu délo xitayning amérikaning oxayyo shitatigha jaylashqan we dunyadiki aldinqi qatarda turidighan ayropilan matori ishlepchiqarghuchilarning biri bolghan GE awi'atsiye shirkiti we shundaqla amérika armiyesining teminligüchisi bolghan bashqa awi'atsiye shérketlirining soda mexpiyetlikini oghrilash urunushliri bilen munasiwetlik iken.

Xewerde körsitilishiche, 31 yashliq ji chawchün, jyangsu ölkilik dölet xewpsizliki nazaritining mu'awin bölüm bashliqi shü yenjünning körsetmisi bilen heriket qilghan bolup, shü yenjün xitayning bu istixbarat herikitidiki muhim shexs iken. U 2018-yili bélgiyede qolgha élinip, amérikagha ötküzüp bérilgen we 2022-yili 11-ayda jasusluq jinayiti bilen 20 yilliq qamaq jazasigha höküm qilin'ghan.