Xarward we boston uniwérsitétliridiki 3 kishi xitaygha jasusluq qilish bilen eyiblendi

Muxbirimiz erkin
2020-01-29
Élxet
Pikir
Share
Print

Amérika hökümiti xarward uniwérsitétining bir proféssori bilen boston uniwérsitéti we bostondiki bir méditsina tetqiqat merkizide ishleydighan ikki xitay tetqiqatchini xitay üchün jasusluq qilish bilen eyibligen.

Roytérs agéntliqining xewer qilishiche, amérikaning masachuséttis shtatidiki rayonluq fédératsiye teptishi 28‏-yanwar küni bu kishilerni xitay hökümiti bilen bolghan alaqiside yalghanchiliq qilish bilen eyibligen. Bu 3 kishining biri proféssor charli'és léybér bolup, u xarward uniwérsitéti ximiye we bi'oximiye fakultétining mudiri iken.

Nöwette, amérika teptish emeldari proféssor léybérni xitaydin pul alghanliqi, uning "Ming talant programmisi" gha qatnashqan bolsimu, lékin buni yoshurup, yalghanchiliq qilghanliqini eyibligen. Xewerde, qalghan ikki kishining xitay puqrasi ikenliki, yé yenching isimlik xitayning boston uniwérsitétida robot, yeni mashina adem tetqiqatchisi, jéng zawsong isimlik yene birining bostondiki bet isra'il dékonés méditsina merkizining rak tetqiqatchisi ikenliki ilgiri sürülgen.

Melum bolushiche, nöwette charli'és léybér bilen jéng zawsong tutqun qilin'ghan, lékin yé yenching amérika edliye tarmaqliri eyibleshtin burun xitaygha kétiwalghan. Ulardin jéng zawsong ötken ayda bir tetqiqat ewrishkisini oghrilap, xitaygha qachmaqchi bolghanda tutqun qilin'ghanidi.

Masachuséttis shtatidiki rayonluq fédératsiye teptishi andréw lélling seyshenbe küni ötküzgen axbarat yighinida mezkur jasusluq weqesini "Bu xitay hökümiti özining istratégiyelik boshluqini toldurush üchün etrapliq orunlashturghan herikettur" dégen. Melum bolushiche, yé yenching xitay azadliq armiyesining léytinanti bolsimu, lékin u özining bu salahiyitini yoshurghaniken. Amérika teptish emeldari bu ikki xitay puqrasini chet'el hökümet agénti, dep eyibligen.

Toluq bet