"Washin'gton waqti" géziti: "Xitay amérikidiki oqughuchilirini jasusluqqa salmaqta"

Muxbirimiz erkin
2018-04-26
Élxet
Pikir
Share
Print

"Washin'gton waqti" géziti charshenbe küni maqale élan qilip, amérikining jasusluqqa qarshi yuqiri derijilik emeldarlirining xitayning amérikidiki oqughuchilirini jasusluqqa séliwatqanliqi heqqidiki agahlandurushini ashkarilighan.

Maqalida neqil keltürülüshiche, amérika döletlik jasusluqqa qarshi turush we bixeterlik merkizining diréktori bil éwanina xitayning amérika üchün eng chong jasusluq tehditi shekillendürüwatqanliqini bildürgen. U, xitayning ilmiy xadimlar we oqughuchilarni ishqa sélip jasusluq bilen shughulliniwatqanliqini, ularning tor hujumi qozghap amérika hökümiti we amérikidiki shexsi karxanilarning mexpiyetlikini oghrilawatqanliqini tekitligen.

Nöwette amérikida bir milyondin artuq chet'ellik oqughuchi bar bolup, uning üchtin bir qismidin köprekini xitay oqughuchilar teshkil qilidiken. "Washin'gton waqti" gézitining bildürüshiche, éwanina yuqiriqi sözlerni ötken hepte amérikining aspén institutida ötküzülgen bir yighinda qilghan. U, bu oqughuchilarning mutleq köp qismi qanunluq ishlar bilen shughulliniwatqan bolsimu, biraq bular "Xitay hökümitining amérikidiki yaman gherezlik pa'aliyetlirini élip bérishta qolliniwatqan qorali" boluwatqanliqini tekitligen.

Uning körsitishiche, tramp hökümiti jasusluqqa qarshi turushta obama hökümitige qarighanda téximu köngül bölmektiken. U, hazir amérikining jasusluqqa qarshi turush nishani xitayning her yili amérikigha séliwatqan 80 milyard dollarliq meblighige buralghanliqini bildürüp, "Eger xitay hökümiti bizning halqiliq ul eslihelirimizni we téxnologiye bazilirimizni sétiwalsa, bu bizning uzun mezgillik dölet bixeterlikimizge tehdit élip kélidu," dégen.

Bil éwanina xitayning amérikidiki jasusluq herikitining zor tehditke aylan'ghanliqini agahlandurghan tunji amérika bixeterlik emeldari emes. Amérika fédératsiye tekshürüsh idarisining bashliqi kristofir réy, dölet mejlisining bu yil 2‏-aydiki guwahliq bérish yighinida xitayning jasusluq herikitining "Pütkül amérika jem'iyitige tehdit séliwatqanliqi" ni bildürgen idi.

Toluq bet