Amérika edliyesi 5 neper xitayni “Jasusluq” bilen eyiblep sotqa tartqan

Muxbirimiz irade
2022.05.19
Share on WhatsApp
Share on WhatsApp

Amérika edliye tarmaqliri bir neper amérika puqraliqidiki xitay bilen 4 neper xitay jama'et xewpsizlik minsitirliqining xadimlirini jasusluq qilish we xitayning chigra halqighan bésim herikiti bilen shughullinish jinayiti bilen eyiblinip sotqa tartilghan. Bu délo nyu-york shehirining bruklindiki fédéral sotida sotlan'ghan.

Amérika edliye ministirliqi tarqatqan bu heqtiki bayanta, yoqiriqi xitay jasuslirining amérikaning nyu-york we bashqa jayliridiki “Xitay kommunist hökümitige qarshi” dep bilin'gen öktichi xitaylar, xongkongluqlar we hetta Uyghurlar hem tibetler üstidin jasusluq qilghanliqi bayan qilin'ghan.

Sot höjjitige qarighanda, bu besh kishi nyu-york shehirining “Kuwin” (Queens, New York) dégen yéridin bolghan 73 yashliq wang shujün, guwangdungluq féng xé, chingdawliq ming li, gu'angdungluq ming li we shyawli, chingdawliq lu kéchinglar iken. 73 Yashliq wang jinayi ishlar erzige asasen 16-mart qolgha élin'ghan bolup, qalghan töti téxi qéchip yürmektiken.

Bu kishiler amérikaning nyu-york shehiridiki we bashqa shitatlardiki xitay kompartiyesige qarshi yaki xitay hökümiti yaxshi körmeydighan xitay öktichiler, Uyghurlar, tibet we xongkongluqlarni teqib qilish, uchur toplash, xitayning j x tarmaqlirigha uchur yetküzüsh, bednam chaplash, parakendichilik sélish we hetta süyiqest pilanlashtek qilmishlar bilen shughullan'ghan.

Amérika edliye ministirliqining bayanatida körsitilishiche, 73 yashliq wang shüjün uzun yil nyu-yorkta yashighan bir “Ilmiy xadim” bolup, u démokratchi qiyapitige kiriwalghanliqtin kishilerning ishenchisige érishken biri iken. U buningdin paydilinip, nurghun öktichiler bilen alaqe qilip ularning oy-xiyalliri, pa'aliyetliri we hetta pa'aliyetlerde sözlimekchi bolghan nutuqi qatarliq uchurlirigha érishken, uni xitay j x ministirliqi xadimlirigha “Kündilik xatire” dégen nam astida yollap turghan. U yene Uyghur, tibet we mongghullarnimu teqib qilghan. U alaqe qilghan bir xongkongluq pa'aliyetchi xongkonggha qaytqandin kéyin, xitay teripidin qolgha élin'ghan.

Amérika edliye ministirliqi dölet xewpsizliki bölümining bash teptish yardemchisi matéw g. Olsén bu heqte qilghan sözide mundaq dégen: “Biz xitay we bashqa her qandaq mustebit hökümetning dölitimizge basturush tedbirlirini éksport qilishigha yol qoymaymiz. Biz her qandaq bir chet el hökümitining söz erkinlikimizge tosqunluq qilishigha, qanunlirimizning qoghdilishini ret qilishigha, shexslerning bixeterlikige yaki a'ilisining bixeterlikige tehdit sélishigha yol qoymaymiz we uni qanuniy jawabkarliqqa tartimiz.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.