Shiwétsiye xitaygha jasusluq qilghan tibetni az kem 2 yilliq qamaq jazasigha höküm qildi

Muxbirimiz erkin
2018-06-18
Élxet
Pikir
Share
Print

Shiwétsiyediki bir sot mehkimisi xitaygha jasusluq qilip, uninggha shiwétsiyediki tibet musapirlirining uchurini toshidighan dorjé gyatsan isimlik bir tibetni az kem 2 yilliq qamaq jazasigha höküm qilghan.

Analizchilar mezkur délo xitayning muhajirettiki Uyghur, tibet jem'iyetlirige suqunup kirishke urunushini yene bir qétim ashkarilap bergenlikini bildürdi. Birleshme agéntliqining xewer qilishiche, 15‏-iyun küni shiwétsiye paytexti stokholimning sodérton rayonluq sot mehkimisi 49 yashliq dorjé gyatsanning xitayni shiwétsiyediki tibet musapirlirining kimliki, siyasiy qarishi, sayahet qilish ehwaligha da'ir uchurlar bilen teminligenlikini muqimlashturup, uninggha 22 ayliq qamaq jazasi bergen.

Dorjé gyatsanning délosi yéqinqi 8 yil mabeynide shiwétsiye sot mehkimisi teripidin xitaygha jasusluq qilish jinayiti muqimlashturulghan étnik musapirlargha chétishliq 2‏-délo. Buningdin 8 yil awwal babur mexsut isimlik Uyghur shiwétsiye puqrasi qolgha élinip, xitaygha jasusluq qilish bilen eyiblen'gen.

Sitokholm shehiridiki bir yerlik sot mehkimisi baburning xitayni Uyghurlargha da'ir uchur bilen teminligenlikini muqimlashturup, uninggha 16 ayliq qamaq jazasi bergen. Mezkur jasusluq weqesi muhajirettiki Uyghurlarning qattiq ghezipini qozghighan idi.

Birleshme agéntliqining xewer qilishiche, dorjé gyatsan 2-15‏-yildin 2017‏-yilghiche xitayning polshadiki bir istixbarat emeldarini uchur bilen teminlep uningdin bir qétimliqida 6 ming dollar tapan heqqi alghan. Shiwétsiye tibet jem'iyitining re'isi jamyang chodon radiyomizgha qilghan sözide, sotning qararini qollaydighanliqini bildürgen.

U, gyatsanning jasusluq herikiti xitay da'irilirining shiwétsiyediki tibetlerning yurtidiki a'ile ezalirini we uruq-tughqanlirini soraq qilishi we parakendilik sélishini keltürüp chiqirip, shiwétsiyediki tibet musapirlirining normal xizmiti we erkinlikige tesir yetküzgen.

Toluq bet