Amérikidiki bir xitay amérika su asti urush paraxotining zapchaslirini xitaygha sétish bilen eyiblinip qolgha élindi

Muxbirimiz erkin
2018-06-22
Élxet
Pikir
Share
Print

Amérika su asti urush paraxotining zapchaslirini xitaygha satqan amérikidiki bir shirketning xitay bashliqi "Etkeschilik" bilen eyiblinip, qolgha élindi.

Roytérs agéntliqining xewer qilishiche, amérikining massachuséts shtatida olturushluq chén shurén isimlik xitay puqrasi wizida saxtipezlik qilish, amérika éksport qanunigha xilapliq qilish bilen eyiblinip, boston shehiridiki bir fédiratsiye sot mehkimiside jinayi jawabkarliqqa tartilghan.

Xewerde 41 yashliq bu xitayning peyshenbe küni qolgha élin'ghanliqi we jüme küni sot mehkimisige chiqirilghanliqini bildürülgen.

Amérikida olturushluq bir qisim xitaylarning amérika karxanilirining eqliy mülüklirini oghrilap, uni xitayning iqtisadiy paydisi we herbiy meqsetlirige ishlitishi tramp hökümiti amérika-xitay munasiwetliride izchil otturigha qoyup kéliwatqan halqiliq mesililerning biri. Prézidént tramp saylam mezgilide buninggha üzül-késil xatime bérishke wede qilghan idi.

Roytérs agéntliqining ashkarilishiche, chén shurénning bir qanche shirkiti bolup, u mexsus amérika we yawropadin su asti téxnikisigha alaqidar eswablarni import qilidiken. Sot mehkimisining eyibnamiside uning xéridarlirining ichide xitay déngiz armiyesining urush qilish bölümi, xitay tetqiqat instituti qatarliq organlarning barliqi ilgiri sürülgen.

Roytérs agéntliqining bildürüshiche, amérika teptish xadimliri chén shurénning 2015‏-yildin 2016‏-yilghiche xitay armiyesining tetqiqat orni bolghan gherbiy-shimal téxnologiye uniwérsitétigha su astida awaz közitishke bolidighan 78 dane hidroluq téléfon sétip bergenlikini bildürgen. Teptish xadimlirining ilgiri sürüshiche, uning bu herikiti amérika dölet bixeterlikige xewp yetküzidiken.

Toluq bet