Kitabqa niqaplan'ghan jasusluq wirusi Uyghurlarni nishan qilmaqta

Muxbirimiz eziz
2022.09.06
Share on WhatsApp
Share on WhatsApp

Dunya Uyghur qurultiyining re'isi dolqun eysaning hayati we siyasiy küresh yoli bayan qilin'ghan “Xitayning erkinlik toziqi” namliq eser yéqinda neshr qilin'ghandin kéyin, oqurmenlerning qizghin alqishigha érishken idi. Emma xitay jasusluq torining bu eserni özlirining yéngi tor jasusluqigha waste qiliwalghanliqi pash bolghandin kéyin, her sahening küchlük diqqitini qozghidi.

“Hazirqi zaman” torida 6-séntebir élan qilin'ghan bu heqtiki tepsiliy xewerde körsitilishiche, tor bixeterliki mutexessisliri yéqinda “Xitayning erkinlik toziqi” namliq eserning PDF nusxisi sheklide teyyarlan'ghan “Androyid” (Android) jasusluq wirusining torgha qoyuwétilgenlikini, buning asasliq nishani xitay téritoriyesi tewesidiki Uyghurlar ikenlikini bayqighan.

Maqalide körsitilishiche, kitabning PDF sheklidiki muqawisi siyaqida teyyarlan'ghan höjjetni chékip uni achqan haman jasusluq wirusi shu kishining kompyutérigha orniship uchurlar, alaqe tizimliki, téléfon xatirisi, barghan orunlar we xatirilen'gen awaz qatarliqlarni yighishqa bashlaydiken. “Saybl” (Cyble) tor bixeterliki shirkiti bu heqte söz qilip: “Nöwette xitay hökümiti bilen Uyghurlar otturisida ewj ‍éliwatqan toqunushning bir ipadisi hazir ashu kitabni yemchük qilghan halda otturigha tashlan'ghan jasusluq wirusida eks etmekte. Bu kitabqa qiziqquchilar tordiki bu qiltaqqa dessigen haman jasusluq wirusi ulargha hujumni bashlaydu” dégen.

Tetqiqatchilar yene bu jasusluq wirusining özi chaplashqan téléfon yaki kompyutérdin esli igisige bildürmestin téléfon bérish yaki élish, uchur yollash yaki tapshuriwélish iqtidari barliqini, jasusluq wirusining yene ékran we kaméra mezmunlirini süretke tartip bash apparatqa yollap béridighanliqini bayqighan.

Melum bolushiche, bu jasusluq wirusi Google Play Store ning sirtidiki menbedin tarqitilghan bolup, bu xildiki “Yawa menbe” lerni ziyaret qilghanda qattiq éhtiyat qilish alahide zörür iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.