Америка армийәсидики бир хитай һәрбий җасуслуқ җинайити билән қолға елинған

Мухбиримиз сада
2018-09-26
Елхәт
Пикир
Share
Принт

Америкидики аммиви радийо қаналлиридин бири болған NPR ниң тор бетидә бүгүн америка дөләт мудапиә саһәсидә тохтамлиқ инженер болуп ишләватқан бир нәпәр хитай хадимниң хитай үчүн җасуслуқ қилиш җинайити билән әйиблинип, қолға елинғанлиқи хәвәр қилинди.

Хәвәрдә бу йил 27 яшқа киргән җи чавчүән үчүн чиқирилған 17 бәтлик әйибнамидә униң америкида һазирғичә байқалған хитай үчүн җасуслуқ қилип қолға чүшкән хитай җасуслириниң бири икәнлики баян қилинған. Әйибнамидә дейилишичә, җи чавчүән оқуғучилиқ визиси билән 2013-йили америкиға кәлгән вә иллиноес техник институтиниң електр қурулуш кәспигә оқушқа кирип, 2015-йили магистирлиқ унвани алған. Андин америка армийәсигә қатнишип запас әскәр салаһийити билән америка дөләт мудапиә саһәсидә тохтамлиқ инженер болуп хизмәткә чүшкән икән.

Хәвәрдә баян қилинишичә, хитай пуқраси болған җи чавчүән америкиниң чикако шәһиридә туруп хизмәт қилған. У хитайниң җияңсу өлкилик дөләт хәвпсизлики назаритидики бир юқири дәриҗилик истихбарат әмәлдариниң көрсәтмиси бойичә хитай тәрәпкә мәхпий мәлуматларни йоллап бәргән. Хәвәрдә җи чавчүәнниң америкиниң дөләт мудапиә саһәсидә хизмәт қилидиған 8 кишиниң шәхсий мәлуматлирини хитайға йоллап берип, хитайниң кәлгүсидики җасуслуқ һәрикити үчүн америкида адәм күчи һазирлиғанлиқи тилға елинған.

Тәптишниң әйибнамисидә йәнә мунулар баян қилинған: «җи чавчүүн хитайға учурини әвәтип бәргән 8 кишиниң бәзилири хитай чоң қуруқлуқидин, бәзилири тәйвәндин америкиға келип олтурақлашқанлар болуп, уларниң бәзилири америкиниң юқири пән-техника саһәсидә хизмәт қиливатқанлар яки шу саһәдин пенсийәгә чиққан кишиләр икән. Йәнә бәзилири америкиниң аләм бошлуқи саһәсидә мәркәзлик тәрбийәләнгән кишиләр икән. Бу 8 кишиниң ичидә һеч болмиғанда 7 киши америка дөләт мудапиәси саһәсидә ишлигән яки пенсийәгә чиққанлар икән.»

Хәвәрдин мәлум болушичә, бу 8 кишиниң һазирға қәдәр хитай истихбарат органлири тәрипидин җасуслуққа қобул қилинған яки қилинмиғанлиқи ениқ әмәс икән.

Пикирләр (0)
Share
Толуқ бәт