Amérika özining hawa boshluqida xitayning bir jasusluq hawa sharini bayqighan

Muxbirimiz erkin
2023.02.03

Amérika bu hepte ‍özining hawa boshluqida amérika emeldarliri teripidin xitayning jasusluq herikiti, dep teriplen'gen bir razwédka hawa sharini bayqighan bolup, bu, bu'amérikaning sezgür dölet bixeterlik orunlirigha qarita ‍istixbarat uchuri toplashtiki tajawuzchiliq herikiti, dep qaralghan. “Wol strét zhurnili” gézitining xewer qilishiche, amérika emeldarliri xitay jasusluq hawa sharining amérika tashqi ishlar ministiri bilinkén xitayni ziyaret qilishni pilanlighan nazuk bir peytte bayqilishi, ikki döletning yershari we rayon xaraktérlik mesililerdiki küchlük ixtilaplirini yumshitish urunushlirigha so'al peyda qilghanliqini éytqan.

Bu weqe amérika herbiy da'irilirini heriketke keltürüpla qalmay, amérika dölet mejlisiningmu qattiq inkasini qozghighan. Amérika awam palatasining re'isi kewin makkarti 2-féwral küni kechte amérikaning eng sezgür istixbarat uchurlirini nazaret qilishqa mes'ul “Sekkiz kishilik guruh” dep atalghan dölet mejlisi ezalirini melumat bérish yighinigha chaqirghan. Kewin makkarti twittérda élan qilghan uchurida “Xitayning amérikaning igilik hoquqigha perwasizlarche köz yumushi choqum hel qilishqa tégishlik bolghan buzghunchiliq herikiti, prézidént baydén buninggha süküt qilmasliqi kérek” dégen. Amérika dölet mudapi'e ministirliqi 2-féwral amérika hawa boshluqida xitayning bir hawa sharini bayqighanliqi we uning izigha chüshkenlikini éytqan.

“Politika géziti” ning éytishiche, dölet mudapi'e ministirliqining bayanatchisi hawa sharining qeyerdin kelgenlikini éytishni re t qilghan bolsimu, lékin dölet mudapi'e ministirliqidiki yuqiri derijilik emeldarlar hawa sharining xitaygha tewe ikenlikige “Nahayiti yuqiri derijide ishenchi” barliqini bildürgen. Melum bolushiche, xitayning jasusluq hawa shari montana shtatida bayqalghan. Nöwette, herbiy terep hawa sharini étip chüshürüsh yaki bashqa chare qollinishni muzakire qilmaqtiken. Awam palatasining bezi jumhuriyetchi ezaliri “Baydénning xitay jasusluq hawa sharini derhal étip chüshürüshi” ni telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.