Хитай камералири белгийә һәрбий инсититутлирини көзитишкә ишлитилгән

Мухбиримиз әзиз
2022.01.26

Белгийәдә нәшр қилинидиған “кәчқурун” (Le Soir) гезитиниң 25-январдики обзор мақалисида көрситилишичә, белгийә һөкүмити хитайдин сетивалған 30 нәччә көзитиш камераси белгийә һәрбий қисимлириниң ишлитишигә аҗритип берилгән болуп, йеқинда буниң җасуслуққа ишлитилгән болуш еһтималлиқи һәққидә ғулғула қозғалған.

Обзорда көрситилишичә, белгийә дөләт мудапиә министири лудивин дефондер бу һәқтики соалларға җаваб берип “хитайдики ‛дахуа‚ вә ‛хиквижин‚ (Hikvision) ширкәтлири ясиған камераларни министирликимиз сетивалған һәмдә һәрбий қисимларға тәқсимләп бәргән” дегән. Әмма апторниң қаришичә, буниңдики бир муһим амил бу ширкәтләр ясиған көзитиш камералириниң уйғур дияридики назарәт механизимиға вә қирғинчилиққа бивастә хизмәт қилғанлиқи икән. Йәнә келип бу хил қирғинчилиққа бивастә ярдәмләшкән бир ширкәтниң товарлирини сетивелиш задила әхлақий мизанларға уйғун кәлмәйдикән.

“хитай һәққидики хәлқара парламентлар бирләшмиси” бу һәқтики әһвалларни өз тор бетидә һәмбәһирлигән һәмдә хитай һөкүмитиниң бу хилдики чегра һалқиған җасуслуқ қилмишлириниң тунҗи қетимлиқ иш әмәсликини алаһидә тәкитлигән.

Бу һәқтики мунасивәтлик хәвәрләрдә хитайниң нөвәттә дунядики әң чоң хәлқаралиқ җасуслуқ мәркизи икәнлики алаһидә йәр алған болуп, уларниң сиңип кириш һәмдә юқури пән-техника вастилири арқилиқ җасуслуқ қилиш қилмишлири явропа тәвәсидә бирнәччә қетим паш болған икән. Бу қетим белгийә һәрбий саһәсиниң хитайдин сетивалған көзитиш камералири улар үчүн қандақ йошурун хейим-хәтәрләргә игә икәнлики нөвәттә көпләп муһакимә қилинмақта икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.