Xitayning bingtu'en'ge qarashliq bir kömür kanda yüz bergen weqede 9 adem öldi

Xitay da'iriliri peyshenbe küni “Shinjang bingtu'eni” ning ürümchide turushluq 6-déwiziye qarmiqidiki bir kömür kénida 13‏-öktebir yüz bergen kan weqesining qutquzush xizmiti axirliship, kan astida qalghan 10 kishidin 9 ning ölgenliki, birining qutquzuwélin'ghanliqini élan qildi.

Shinxu'a agéntliqining ashkarilishiche, mezkur weqe 6‏-déwiziye tewelikidiki junggo kömür énérgiye shirkitige qarashliq tengritagh kömür éléktr shirkitining kan quduqida yüz bergen. Weqe kan quduqining gümürülüp chüshüshidin kélip chiqqan. Biraq xitay axbaratining xewerliride, mezkur kan quduqining tepsiliy orni tilgha élinmighan.

Xitay hökümiti 2009‏-yili “5‏-Iyul weqesi” din kéyin, Uyghur élide köplep kömür éléktr istansilirini qurup, Uyghur ilining kömür kan bayliqini öz jayida serp qilish, bu arqiliq hem ichkiri ölkilerning muhit bulghinishini kontrol qilish hem ular éhtiyajliq éléktr énérgiyini Uyghur ilidin teminleshni yolgha qoyushqa bashlighan idi.

Biraq közetküchilerning ilgiri sürüshiche, bu, Uyghur élide kömür kanlirining köplep échilip muhit bulghinishini tézlitipla qalmay, bu yene ishlepchiqirish bixeterliki jehettimu éghir boshluq peyda qilip, kan weqelirining köpiyishini keltürüp chiqarghan.

Xitay dunyadiki kan kömür kan weqeliri eng köp yüz béridighan dölet. 2013‏-Yili xitay boyiche az dégende 1039 kishi kan weqeside ölgen.