Xitay hökümiti kanadadiki “Uyghur heqlirini qoghdash qurulushi” we uning mes'ullirigha émbargo élan qilghan
2024.12.23
Kanada hökümitining yéqinda erkin tuniyaz qatarliq 8 neper yuqiri derijilik xitay emeldarini jazalishidin kéyin, xitay hökümiti 21-dékabir buninggha qarshi öch élish xaraktérlik tedbir yürgüzüp, kanadadiki bir Uyghur teshkilati bilen bir tibet teshkilatini we ularning rehberlik qatlimidiki 20 kishige émbargo qoyghanliqini élan qilghan.
Xitay tashqi ishlar ministirliqining torida élan qilin'ghan bu heqtiki uchurlardin melum bolushiche, xitay da'iriliri bu qétimliq öch élishta kanada “Uyghur heqlirini qoghdash qurulushi” bilen “Kanada tibet komitéti” ni nishan qilghan. Xitay da'irilirining öch élish xaraktérlik émbargo tedbiri “Uyghur heqlirini qoghdash qurulushi” ning ijra'iye diréktori memet toxti, bu teshkilatning siyaset we pa'aliyet diréktori yasimin kéynis, shundaqla bu teshkilatning qanun we siyasiy meslihetchiliridin deywid matas, sarah téych, yunah diyamund, jon pekér qatarliq on nechche shexske qaritilghan.
Kanada hökümiti yéqinda Uyghur aptonom rayonining hazirqi re'isi erkin tuniyaz, sabiq partkom sékrétari chén chüen'go, “Shinjang ishlepchiqirish qurulush bingtüeni” ning sabiq qomandani péng jyarüy qatarliq sabiq we hazirmu wezipidiki 8 neper yuqiri derijilik emeldarigha Uyghur ili we tibettiki kishilik hoquq depsendichiliki sewebidin émbargo yürgüzgen idi. Halbuki, kanada hökümitining émbargo qarari xitayning yuqiri derijilik hökümet emeldarlirini nishan qilghan bolsimu, lékin xitayning öch élish xaraktérlik émbargo tedbirining ikki kishilik hoquq teshkilatini nishan qilishi diqqet qozghimaqta.
Kanadadiki “Qanunshunas” qatarliq taratqularning bildürüshiche, “Uyghur heqlirini qoghdash qurulushi” ning ijra'iye diréktori memet toxti, “Biz bu jazani sherep belgisi süpitide qobul qilimiz. Ular bizni tosup qalalmayla qalmay, belki bizning iradimizni téximu kücheytidu. Bu bizning toghra yolda ikenlikimizni körsetmekte” dégen. Melum bolushiche, xitayning émbargo qarari boyiche bu kishilerning xitaygha kirishi cheklinidiken, shundaqla xitaydiki mal-mülki tonglitilidiken.