Iz-déreksiz yoqap ketken xitay karxanichining paychéki qattiq chüshüp ketti

Muxbirimiz erkin
2017-02-03
Share

27‏-Yanwar xongkongda iz-déreksiz yoqap ketken kanadaliq xitay karxanichi shyaw jyenxu'aning kontrolluqidiki bezi shirketlerning paychéki qattiq chüshüp ketken.

Uning xongkongdiki bash shirkiti jüme küni bayanat élan qilip, shirketning tijariti normal kétiwatqanliqini bildürgen bolsimu, emma bu paychékining dawamliq chüshüp kétishini tosup qalalmighan. Roytérsning xewiride qeyt qilishiche, shyaw jyenxu'a kontrol qilip turghan ichki monggholdiki ikki shirketning pay chéki jüme küni 10% chüshüp ketken. Shyaw jyenxuning iz-déreksiz yoqap kétishi xongkongda zor ghulghula qozghighan idi.

Xongkong saqchilirining roytérs agéntliqigha bildürüshiche, u 27‏-yanwar xitaygha kirip ketken. Saqchilar roytérs agéntliqigha bergen uchurida, xitay da'iriliridin uning iz-dérikini qiliwatqanliqini bildürgen.

Shyaw jyenxu 27‏-yanwar ghayib bolup 2‏-küni xongkong gézitliride uning qisqa bayanati élan qilin'ghan. U bayanatida, özining dawalinish üchün sirtqa chiqip ketkenlikini bildürgen idi. Xitay tashqi ishlar ministirliqi bayanatchisi lu kang jüme küni bu weqege pikir bayan qilishni ret qilghan. Kanada tashqi ishlar ministirliqi bayanatchisi, kanadaning yerlik da'iriler bilen alaqilishiwatqanliqini bildürgen.

Xitay hökümiti 1997‏-yili xongkongni ötküzüwalghanda, uning ichki ishlirigha arilashmasliqqa, edliye musteqilliqigha hörmet qilishqa wede bergen. Biraq,xitay amanliq organlirining yéqindin béri xongkonggha kirip, öktichilerni mexpiy tutup chiqip kétishi xongkong puqralirining qattiq naraziliqini qozghap kéliwatqan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet