Xitay hökümiti aq tashliq kitab élan qilip, özining 70 yilliq kishilik hoquq xatirisini aqlidi

Muxbirimiz erkin
2019-09-23
Élxet
Pikir
Share
Print

Xitay hökümiti22 ‏-séntebir küni "Kishilik hoquq aq tashliq kitabi" élan qilip, özining xitay kompartiyesi hakimiyet sorighan 70 yildin béri xitayning kishilik hoquq saheside nurghun utuqlargha érishkenlikini ilgiri sürdi.

"Xelqning xushalliqini izdesh: xitayning 70 yilliq kishilik hoquq tereqqiyati" namliq aq tashliq kitabta yashash hoquqining1 ‏-nomurluq kishilik hoquq ikenliki tekitlinip, bu 70 yilda xelqning her xil kishilik heq-hoquqlirining hörmet qilin'ghanliqi we kapaletke érishkenlikini bildürgen. Lékin aq tashliq kitabta 1950‏-yillarning bashliridiki "Eksil'inqilabchilarni basturush", 1950‏-yillarning axiridiki ongchilargha zerbe bérish, 1960‏-yillarning bashliridiki acharchiliq, "Medeniyet inqilabi" diki ziyankeshlikler we dewrimizde 2 milyondek Uyghurning "Térrorluq", "Esebiylik" ke qarshi turush namida lagérlargha qamilip, a'ililirining weyranchiliqqa uchrishi, Uyghur jem'iyitining omumyüzlük teqib qilinishi tilgha élinmighan. 

Aq tashliq kitabta qeyt qilinishiche, "Ötken 70 yilda xitay milliti ornidin des turghan, güllen'gen we bay bolghan. Xelqning barliq tüp hoquqlirigha téximu yaxshi hörmet qilin'ghan we kapaletke ige bolghan. Xitay xelq'ara kishilik hoquq ishlirigha töhpe qoshqan" iken. Lékin mezkur aq tashliq kitab amérika hökümiti düshenbe küni b d t da xitayning 2 milyondek Uyghurni yighiwélish lagérlirigha qamighanliqigha qarshi heriket qozghighan künning harpisida élan qilindi. 

Amérika tashqi ishlar ministiri mayk pompéyo yekshenbe küni xitayning Uyghur rayonidiki basturush herikitining "Térrorluq" bilen munasiwiti yoqluqini, xitayning herikitining Uyghurlarni yoqitishqa qaritilghanliqini bildürgen. Mayk pompéyo düshenbe küni b d t da diniy erkinlik yighini chaqirghan. Yighin'gha prézidént tramp, mu'awin prézidénét mayk pens, b d t bash katipi gutérris qatarliqlar qatnashqan. Yighinda ilham toxtining qizi jewher ilham söz qilip, dunyani Uyghurlarni qoghdashqa chaqirghan idi.

Toluq bet