Dunyaning diqqitini qozghap kelgen xitay kompartiyesining 3-omumi yighini béyjingda bashlan'ghan

Xitay kompartiyesining nechche aylardin béri kéchiktürülüp kéliwatqan 20- nöwetlik 3-omumiy yighini 15-iyul béyjingda bashlan'ghan. Yighin xitay kompartiyesining siyasitide qandaq özgirish yasaydighanliqi dunyaning diqqet nuqtisi bolmaqta. Bu qétimliq yighin xitay iqtisadi kasatliship, ishsizliq künséri éshiwatqan, xitayning gherb bilen bolghan munasiwiti keskinliship, uninggha qarita iqtisadiy jaza kéngiyiwatqan, béyjingning Uyghur irqiy qirghinchiliqini jawabkarliqqa tartish chuqanliri dawamlishiwatqan bir peytte chaqirilghan. Xitay hökümet taratquliri  islahat , shi jinpingning xitayni yéngi bir yölinishke élip méngip, xitayning iqtisadiy ösüsh sür'itini qayta tézlitishidiki “Sirliq qorali” dep chuqan séliwatqan bolsimu, emma analizchilar xitayda “Heqiqiy özgirish” ning bolushigha guman bilen qarimaqta.

Xitay kompartiyesining zuwani bolghan “Xelq géziti” 15-iyul élan qilghan tehrirat maqaliside, “Islahat we échiwétishning dawamlishidighanliqi we yéngi bir sehipe échilidighanliqi” ni ilgiri sürgen. Maqalida, “Bu sirliq qoral bilen xitay iqtisadi we jem'iyitining ghayet zor özgirishlerni bashtin kechürgenliki” tekitlen'gen. Lékin radiyomiz xitay bölümining qeyt qilishiche, obzorchi we analizchilar bu yighinda chong islahatning otturigha chiqishining natayin ikenliki, da'irilerning istémal béjini ashurush arqiliq neq pul qiyinchiliqigha duch kéliwatqan yerlik hökümetlerning kirimini ashurushqa merkezlishishi mumkinlikini bildürmekte iken. Bezi analizchilar, baj islahati béyjing jingshi méhmanxanisida 18-iyulghiche dawamlishidighan bu qétimliq yépiq yighindiki eng chong mesile ikenlikini éytqan. Bezi analizchilarning qeyt qilishiche, xitay hökümet taratqulirining shi jinpingni déng shawpinggha oxshash islahatchi qilip körsitishtek chuqanlar, xitayda hemme yerni ümidsizlik qaplighan bir peytte otturigha chiqmaqtiken. Roytérs agéntliqining bu heqtiki xewiride, xitay da'irilirining béyjingda qattiq bixeterlik tedbirlirini alghanliqi, yighin échiliwatqan jingshi méhmanxanisi jaylashqan orunni alahide “Herbiy rayon” dep békitilgenliki qeyt qilinmaqta.