Помпейо хитайниң ню-йорктики консулханисиниң җасуслуқ увиси икәнлики, техиму көп җасусларниң қолға елиниши мумкинликини билдүргән

Мухбиримиз әркин
2020-09-25
Елхәт
Пикир
Share
Принт

Америка ташқий ишлар министири майк помпейо хитайниң ню-йорк шәһиридики консулханисиниң чоң җасуслуқ увиси икәнлики, ню-йорк сақчи идарисиниң хитай үчүн җасуслуқ қилип қолға әлинған тибәт сақчисидин кейин, техиму көп җасусларни қолға елиши мумкинликини билдүргән. Майк помпейониң 24-сентәбир «ню-йорк почтиси» гезитигә билдүрүшичә, нөвәттә трамп һөкүмити хитайниң америкадики дипломатлирини йеқиндин көзәтмәктә икән.

Помпейо хитай дипломатлириниң һәркити «нормал дипломатийә чеграсидин һалқип, җасуслуқ һәрикәтлиригә охшап қалғанлиқи» ни билдүргән. У йәнә «есиңңиздә болсунки, бизниң бу йәрдә хитай консулханилиридин башқа бдт органлири бар» дегән. Униң тәкитлишичә, хитайниң ню-йорк шәһридә консулханиси болупла қалмай, бдт диму нурғун дипломати бар икән. Помпейо бу сөзләрни ню-йорк сақчи идарисиниң бәйма даҗйе аңваң исимлик бир тибәт сақчиси қолға елинип бир қанчә күндин кейин қилған.

Бәйма даҗйе аңваң хитай һөкүмитиниң «җасусклуқ хадими» дәп қолға елинған. Мәлум болушичә, америкадин сиясий панаһлиқ тиләп америка пуқралиқиға өткән бәйма даҗйе аңваң 2018-йилдин бери хитайниң ню-йорк консулханисидики намәлум шәхсләргә ишләп, уларни америкадики тибәт мустәқиллиқини қоллиғучиларниң учури билән тәминләп кәлгән. Майк помпейо «ню-йорк почтиси» гезитигә буниң бу дело билән чәклинип қалмайдиғанлиқи, өзиниң бундақ делолар техиму көп көрүлиду, дәп қарайдиғанлиқини билдүргән.

Пикирләр (0)
Share
Толуқ бәт