Pompéyo xitayning nyu-yorktiki konsulxanisining jasusluq uwisi ikenliki, téximu köp jasuslarning qolgha élinishi mumkinlikini bildürgen

Muxbirimiz erkin
2020-09-25
Élxet
Pikir
Share
Print

Amérika tashqiy ishlar ministiri mayk pompéyo xitayning nyu-york shehiridiki konsulxanisining chong jasusluq uwisi ikenliki, nyu-york saqchi idarisining xitay üchün jasusluq qilip qolgha elin'ghan tibet saqchisidin kéyin, téximu köp jasuslarni qolgha élishi mumkinlikini bildürgen. Mayk pompéyoning 24-séntebir "Nyu-york pochtisi" gézitige bildürüshiche, nöwette tramp hökümiti xitayning amérikadiki diplomatlirini yéqindin közetmekte iken.

Pompéyo xitay diplomatlirining herkiti "Normal diplomatiye chégrasidin halqip, jasusluq heriketlirige oxshap qalghanliqi" ni bildürgen. U yene "Ésingngizde bolsunki, bizning bu yerde xitay konsulxaniliridin bashqa bdt organliri bar" dégen. Uning tekitlishiche, xitayning nyu-york shehride konsulxanisi bolupla qalmay, bdt dimu nurghun diplomati bar iken. Pompéyo bu sözlerni nyu-york saqchi idarisining beyma dajyé angwang isimlik bir tibet saqchisi qolgha élinip bir qanche kündin kéyin qilghan.

Beyma dajyé angwang xitay hökümitining "Jasuskluq xadimi" dep qolgha élin'ghan. Melum bolushiche, amérikadin siyasiy panahliq tilep amérika puqraliqigha ötken beyma dajyé angwang 2018-yildin béri xitayning nyu-york konsulxanisidiki namelum shexslerge ishlep, ularni amérikadiki tibet musteqilliqini qollighuchilarning uchuri bilen teminlep kelgen. Mayk pompéyo "Nyu-york pochtisi" gézitige buning bu délo bilen cheklinip qalmaydighanliqi, özining bundaq délolar téximu köp körülidu, dep qaraydighanliqini bildürgen.

Toluq bet