Xitayning pakistandiki konsulxanisi qoralliq hujumgha uchridi

Muxbirimiz erkin
2018-11-23
Élxet
Pikir
Share
Print

Pakistanning karachida turushluq xitay konsulxanisi 23‏-noyabir küni qoralliq kishilerning hujumigha uchrap, 7 adem ölgen.

Ölgenlerning 3 nepiri qoralliq hujumchilar, ikki nepiri saqchi we ikki nepiri puqra iken. Hujumchilar konsulxanigha basturup kirishke urun'ghan bolsimu, lékin bu pilani emelge ashmighan. Bu arida yüz bergen toqunushta 3 neper hujumchi we konsulxanini qoghdawatqan saqchilardin ikki kishi öltürülgen. Lékin konsulxana ichidiki xitay xadimlardin ölgen yaki yarilan'ghanlar bolmighan.

BBC Ning xewer qilishiche, hujum weqesi karachi waqti etigen sa'et 9:30 etrapida yüz bergen bolup, hujum xitayning balujistan ölkisige meblegh sélishigha qarshi turuwatqan qoralliq guruhlar teripidin élip bérilghan iken. Balujistan "Qeshqer-gwadar iqtisadi karidori" ning déngizgha chiqish éghizi bolup, xitay hökümiti mezkur karidor qurulushigha 60 milyard dollar meblegh sélishni wede qilghan. Lékin bu qurulush yerlik balujistan xelqining qarshi turushigha uchrighan. Ular pakistan hökümitini xitay bilen til biriktürüp, balujistan xelqini ékspilatatsiye qilish, bayliqini bulang-talang qilip, muhitini weyran qilish eyiblep kelgen. Bu rayondiki xitay qurulush xadimliri da'im balujistan azadliq armiyesi namliq qoralliq teshkilatning hujumigha uchrap turghan idi.

Firansiye agéntliqining xewer qilishiche, balujistan azadliq armiyesi xitay konsulxanigha qaritilghan hujumni özlirining élip barghanliqini bildürgen. Mezkur qoralliq guruhning bayanatchisi jüme küni firansiye agéntliqigha bergen bayanatida "Biz xitayni pakistan qoralliq küchlirige hemdemlishiwatqan basqunchi dep qaraymiz," dégen. Roytérs agéntliqining xewer qilishiche, xitay tashqi ishlar ministiri wang yi hujumdin "Chöchügenliki" ni bildürüp, pakistandin bu xil hujumlarning qayta yüz bérishining aldini élishni telep qilghan.

Toluq bet