Б д т хитай һөкүмитиниң тәсиригә учраш билән әйибләнди
2017.05.23
Хитай һөкүмитиниң өзиниң иқтисадий күчидин пайдилинип, өктичи авазларни җимиқтуруш һәрикитиниң күчийиватқанлиқи диққәт қозғимақта.
23-Май сәйшәнбә күни кишилик һоқуқни көзитиш тәшкилати хитай ишлири директори софи ричардсон бу һәқтә баянат елан қилип, хитайниң кишилик һоқуқ дәпсәндичиликиниң бирләшкән дөләтләр тәшкилатиғиму тәсир көрситиватқанлиқини тәнқид қилди.
У баянатида, бу йил 26-апрел күни дуня уйғур қурултийи баш катипи долқун әйсаниң тәклипкә бинаән б д т ниң нюйорктики баш оргинида өткүзүлгән “йәрлик милләтләрниң мәңгүлүк мунбири” дә уйғур мәсилисини аңлитишқа кәлгәндә, б д т бинасидики бихәтәрлик хадимлири тәрипидин йиғин мәйданидин мәҗбурий һалда чиқириветилиши, бундин башқа йәнә, бу йил биринчи айда хитай дөләт рәиси ши җинпиң б д т ниң җәнвәдики бинасини зиярәт қилғанда шу йәрдики һөкүмәткә қарашлиқ болмиған мустәқил органларниң бинаға киришигә рухсәт қилинмиғанлиқи вә шуниңдәк б д т баш катипи антонию гуттерсниң хитайниң кишилик һоқуқ хатирисини тилға елипму қоймиғанлиқидәк мисалларни тәкитлигән.
У: “бирләшкән дөләтләр тәшкилати рәһбәрлири алди билән кишилик һоқуқ дәпсәндичиликигә көз юмувалидиған бундақ ‛илләт‚ тин йирақ туруши, кишилик һоқуқ мәсилисидики түврүклүк ролини қоғдиши керәк” дәп әскәрткән. Шундақла у йәнә, б д т ни хитай һөкүмитиниң кишилик һоқуқ дәпсәндичилик һәрикәтлиригә инкас қайтурушқа чақирған.
Б д т даирилири әйни чағда долқун әйса әпәндини йиғинға қатнишиштин чәклиши һәққидә ениқ бир сәвәб көрсәтмигән иди.