Хитай ташқи ишла министири мюнхен бихәтәрлик йиғинида лагерларниң мәвҗутлуқини инкар қилди

Мухбиримиз әркин
2020-02-14
Елхәт
Пикир
Share
Принт

Хитай ташқи ишлар министири ваң йи уйғур районида 3 милйондәк мусулман қамалған лагерларниң мәвҗутлуқини инкар қилған. Униң илгири сүрүшичә, мәзкур районда «һечқандақ бузғунчилиқ елип берилмиған, шундақла бирму җаза лагери мәвҗут әмәс» икән. У бу сөзләрни 13‏-феврал күни германийә ташқи ишлар министири хәйку маас билән өткүзгән ахбарат йиғинида қилған.

Ваң йи «мюнхен бихәтәрлик йиғини» ға қатнишиш үчүн германийәгә кәлгән иди. Йилда бир қетим ечилидиған «мюнхен бихәтәрлик йиғини» 14‏-феврал башланған.

3 Күнлүк йиғинға фирансийә президенти макрон, канада баш министири тредо, америка ташқи ишлар министири помпейо, иран ташқи ишла министири муһәммәт җавад зариф, хитай ташқи ишлар министири ваң йи, ш а ә т баш катипи столтенберг қатарлиқ қатнашқан.

Бу қетимқи «мюнхен бихәтәрлик йиғини» хитайни қаплиған «вухән вируси» уйғур аптоном райониға тарқилип, униң лагерларға тарқилиш хәвпи хәлқара теббий мутәхәссислиридә қаттиқ әндишә қозғаватқан мәзгилдә чақирилған иди.

«Америка авази» радиосиниң хәвәр қилишичә, ваң йи хәйку маас билән өткүзгән ахбарат йиғинида мухбирларниң лагерлар һәққидики соалиға җаваб берип, «дуняниң һәр қайси җайлиридин мухбирларни, аммиви тәшкилатларни җүмлидин дипломатларни шинҗаңға берип, тәкшүрүш елип бериш вә зиярәт қилишқа тәклип қилдуқ. Һәр қайси дөләтләрниң охшимиған нуқтиинәзири болуши мумкин. Лекин бир нуқтини һечким инкар қилалмайду. У болсиму һечким бирәр җаза лагерини, һечқандақ бир бузғунчилиқни көрүп бақмиди» дегән.

Униң илгири сүрүшичә, җаза лагери, бир милйон адәмниң тутқун қилиниши, дегәнләр пүтүнләй «өсәк сөз» һәм «сахта хәвәр» икән.

Хитай һөкүмити илгири лагерларниң мәвҗутлуқини пүтүнләй инкар қилип, кейинрәк бу орунларниң «кәспий тәрбийәләш мәркәзлири» икәнликини илгири сүргән. Хитай һөкүмити пакистан, иран, бенгал, мисир, русийә қатарлиқ дөләтләрниң мухбир, дипломатлирини мәзкур районда зиярәткә орунлаштурған болсиму, лекин б д т кишилик һоқуқ кеңиши вә ғәрб дөләтлириниң бу райондики халиған лагерда тәкшүрүш елип бериш тәлипини изчил рәт қилип кәлгән иди.

Пикирләр (0)
Share
Толуқ бәт