Xitay ma'arip ministiri mexsus qeshqer qatarliq jaylardiki ma'arip ehwalini tekshürdi

Muxbirimiz ümidwar
2017-06-18
Élxet
Pikir
Share
Print

Xitay döletlik ma'arip ministirliqi bashliqi mexsus qeshqer qatarliq jaylarning ma'arip saheside tekshürüsh élip barghan bolup, 16- 17-iyun künliri xitay ma'arip ministiri chén bawshéng bashchiliqidiki bir ömek qeshqer shehirige jaylashqan qeshqer uniwérsitéti, dölet bagh yeslisi we bashqa jaylarda ziyarette bolup, söhbet yighinliri ötküzgen.

Xitay hökümet xewerliridin melum bolushiche, chén bawshéng bashchiliqidiki mezkur ömekning wezipisi Uyghur diyaridiki aliy mekteplerdiki siyasiy idiye xizmetliri, qosh tilliq ma'arip ehwali shuningdek Uyghur diyaridiki ma'arip islahat ehwalini tekshürüshtin ibaret.

Xitay ma'arip ministiri chén bawshéng bashchiliqidiki xitay merkizi hökümitining mezkur tekshürüp tetqiq qilish ömiki Uyghur aptonom rayonluq partkomning ma'arip xizmetlirige mes'ul mu'awin sékrétari ili péngshin qatarliqlarning doklatini anglighan.

Tengritagh torining xewiride ilgiri sürülüshiche, xitay ma'arip ministiri chén bawshéng sözide Uyghur aptonom rayoni da'irilirini "Ma'aripni ijtima'iy muqimliq we ebediy eminlikni qoghdashning eng asasliq we eng muhim chare-tedbiri" qilghanliqini mu'eyyenleshtürgen. Emma, Uyghur aptonom rayonluq partkomining mu'awin sékrétari ili péngshin özlirining Uyghur rayonida yürgüzüwatqan ma'arip siyasitini, dölet re'isi shi jinpingning "Shinjangning m muqimliqini qoghdap, ebediy eminlikni emelge ashurushtiki tügün ademde, achquch ma'aripta" dégen yolyoruqi asasida yürgüzgenlikini éytqan.

Xewer wasitiliridin melumki, yéqinqi waqitlardin buyan xitay merkizi hökümiti aliy mekteplerdiki idiyiwi-siyasiy xizmetni kücheytiwatqan bolup, Uyghur diyaridiki aliy mekteplerni öz ichige alghan ma'arip sahesidiki siyasiy idiyiwi xizmet atalmish "Üch xil küchler" ge qarshi küresh qilishqa qaritilghan idi. Analizchilarning qarishiche, Uyghur rayoni partkom da'iriliri nöwette xitayning asasiy qanuni we milliy térritoriyilik aptonomiye qanuni qatarliq qanunliridiki milliy til we milliy ma'arip hoquqlirini bir chetke qayrip qoyup, Uyghur aptonom rayonining asasi milliti - Uyghurlarning we bashqa milletlerning uzun yillardin buyan dawamlashturup kéliwatqan milliy ma'aripini xitaychilashturush qedimini tézletmekte.

Toluq bet