Хитай малайшиядин 11 нәпәр уйғурни қайтуруп беришни рәсмий тәләп қилған

Мухбиримиз үмидвар
2018-02-11
Share

Хитай малайшиядин бу дөләткә қечип барған 11 нәпәр уйғурни қайтуруп беришни рәсмий тәләп қилған болуп, бу учурни малайшия муавин баш министири аһмәд заһит һамиди мәтбуатқа ашкарилиған. Техи җүмә күни хитай ташқи ишлар баянатчиси гең шуаң хитай һөкүмитиниң бу 11 уйғурни малайшия һөкүмитидин қайтуруп беришни тәләп қилиш ишидин хәвири йоқлуқни билдүргән иди.

«Җәнуби хитай сәһири» гезитиниң шәнбә күнидики мақалисидә қәйт қилинишичә, малайшия муавин баш министири вә бихәтәрлик министирлиқ вәзиписини өтәватқан аһмәд заһит һамиди хитай һөкүмитиниң 11 уйғур қайтуруп бериш тәлипини рәсмий оттуриға қойғанлиқини ашкарилиған.

Җүмә күни болса америка дөләт ишлири министирлиқи бу 11 уйғурниң хитайға қайтурулушидин әндишилиниватқанлиқини билдүрүп, малайшияни бу қәдәмни басмаслиққа дәвәт қилған болуп, америка дөләт ишлири министирлиқи баянатчиси ройтерсқа: «биз хитай һөкүмитини хәлқара кишилик һоқуқ нормилириға һөрмәт қилишқа, хитайға қайтурулғанларниң һоқуқлириға һөрмәт қилип, қануний җәрянларниң очуқ-ашкарилиқи вә адиллиқиға капаләтлик қилишқа чақиримиз‏,» дегән иди.

Кишилик һоқуқни көзитиш тәшкилатиму охшашла малайшия һөкүмитини бу уйғурларни хитайға қайтурмаслиққа чақирған.

Бирақ, малайшияниң «The Star» ториниң 11-февралдики хәвиридә қәйт қилинишичә, аһмәд заһит һамиди бу уйғурларниң қайтурулуш ишиниң пәқәт малайшия сақчи даирилири тәрипидин уларниң «даиш» гуруппилириға қатнашқан-қатнашмиғанлиқи тәкшүрүлүп хуласә чиқирилиши билән мунасивәтлик икәнликини илгири сүргән. У һәмдә хитай тәрәп билән малайшия бихәтәрлик оргини тәрәпниң бу һәқтә сөзлишиватқанлиқини, шуниңдәк икки дөләт арисида җинайәтчиләрни қайтуруп бериш келишими барлиқини ейтқан.

Мәзкур 11 нәпәр уйғур 2017-йили, 11-айда тайландтики тутуп туруш орнидин қечип, малайшия чеграси ичигә киргәндин кейин малайшия тәрәптин тутулған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт