Hindistandiki islam ölimaliri musulmanlardin xitayda ishlen'gen jaynamazlarni bayqut qilishni telep qilghan

Muxbirimiz qutlan
2017-05-15
Share

Hindistan musulmanlirining eng muhim teshkilatliridin biri bolghan "Musulmanlar birleshme munbiri" bügün bayanat élan qilip, hindistan musulmanliridin xitayda ishlen'gen jaynamazni bayqut qilishni telep qilghan.

"Hindistan waqit géziti" ning bügünki xewirige qarighanda, mezkur bayanat "Musulmanlar birleshme munbiri" ning asasliq ölimaliridin mewlane muhemmed husamiddin sanining namida élan qilin'ghan.

Mewlane muhemmed husamiddin sani musulmanlarning xitayda ishlen'gen jaynamaz, zilcha-gilem we bashqa mehsulatlarni sétiwélishta intayin éhtiyatchan bolushini, Uyghur musulmanlirining diniy étiqadigha cheklime qoyghan bir dölette ishlen'gen jaynamazda namaz oqushning musulmanlar üchün muwapiq emeslikini alahide tekitligen.

U mundaq dégen: "Biz xitayning Uyghur musulmanlirining kündilik diniy étiqad erkinlikige türlük cheklimilerni qoyghanliqini taratqulardin oquwatimiz. Bundaq ehwalda musulmanlarning xitayda ishlen'gen jaynamazlarni sétiwélip, uning üstide namaz oqushi ja'iz emes."

Mewlane sani yene hindistanning bir sana'et döliti bolush süpiti bilen öz dölitidiki milyonlighan musulmanlar üchün jaynamaz ishlepchiqirip, ularninng diniy hayatida lazim bolidighan mehsulatlarni bazargha sélishni telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.