Antoni blinkén: "Xitaygha, ularning Uyghurlargha we xongkongluqlargha yürgüzgen qilmishlirigha qarshi turduq hemde bashqa döletlernimu shundaq qilishqa chaqirduq"

2021-02-17
Share

16-Féwral, amérikaning hökümet torida amérika tashqi ishlar ministéri antoniy blinkén bilen ötküzülgen radiyo söhbiti élan qilin'ghan bolup, bu söhbette antoni blinkén sabiq prézidént donald trampning xitaygha qaratqan siyasitining tesiri we xitayning Uyghurlargha élip barghan irqiy qirghinchiliqi heqqide soralghan so'allargha jawab bergen.

Antoni blinkén donald trampning siyasiti heqqide toxtilip, uning xitaygha qarshi turush siyasitining toghr bolghanliqini, emma xitaygha qarshi xelq'ara birlik sep quralmighanliqini éytqan. Uning bildürüshiche, amérika xitaygha taqabil turushta choqum gherb elliri we bashqa döletler bilen hemkarlishishi, xelq'araliq teshkilatlargha qaytidin kirishi kérek, bolmisa buning ornini xitay igilep, amérikigha bésim qilidu.

Antoni blinkén muxbirning "Amérika hökümiti irqiy qirghinchiliq yürgüzüwatqan xitaydek bir hökümet bilen qandaq munasiwet qilidu?" dégen so'aligha jawab bérip mundaq dégen: "Bu nechche on yildin buyan amérika duch kéliwatqan zor mesile. Buning üchün biz her ikki terepke muwapiq kélidighan bir usulni tépishimiz kérek. Biz hazir kishilik hoquq we démokratiyeni diplomatiye siyasitimizning yadroluq ornigha qayturup kélishke tirishiwatimiz. Bérma mesiliside biz bu siyasiy özgirishni eybliduq we bashqa döletlerni birlikte heriket qilishqa chaqirduq. Xitaygha kelgende, ularning Uyghurlargha we xong kongluqlargha yürgüzgen qilmishlirigha qarshi turduq hemde bashqa döletlernimu shundaq qilishqa chaqirduq".

Antoni bilinkén yene xitayning jinayitini tosush üchün nöwette kishilik hoquqni depsende qilishqa chétishliq mehsulatlarni xitaygha éksport qilmasliq we mejburiy emgekke chétishliq mehsulatlarni amérikigha import qilmasliqning amérika hökümiti qilalaydighan muhim ishlar ikenlikini, 2022-yil béyjingda ötküzülmekchi bolghan qishliq olimpék musabiqisigha qatnishish-qatnashmasliq mesilisige shu waqit kelgende qarar béridighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet