Көзәтчиләр: "җудалиқ һәсрити хитайниң рәзилликини дуняға рошән көрситип бериду"

Мухбиримиз җәвлан
2021-04-21
Share

Хитайниң нурғун уйғур аилилирини вәйран қилип, алақә вә бериш-келиш йоллирини қамал қилиши көплигән трагедийәлик һекайиләрни мәйданға кәлтүрүп, муһим хәлқара ахбарат темилириға айланмақта.

21-Апрел "дипломат" журнилида "йоқап кәткән уйғур балилири" намлиқ бир мақалә елан қилинған болуп, 5 йил бурун қизидин айрилған бир уйғур аниниң ечинишлиқ һекайиси баян қилинған.

Бу йил 47 яшқа киргән мәрйәм абдулһәмид 4-балисини туғуш үчүн 2016-йил түркийәгә кәлгән, шу йил 12 яшқа киргән қизи ризвангулниң паспорти чиқмиғанлиқи үчүн дадисиниң қешида қалған. Мәрйәм абдулһәмид бу қизи билән ахирқи қетим 2017-йил көрүшкәндә қизи: "дадам қени? мән бу йәрдә ялғуз қалдим, һечким мениң һалимдин хәвәр алмайду" дегән. Демәк, дадисини хитайлар лагерға елип кәткәндин кейин бу қиз ялғуз қалған. Хитай һөкүмити бу аилини қара тизимликкә тиққандин кейин уруғ-туғқанлириму униңға ярдәм қилалмиған.

Қизиниң дәрдидә пучулинип, кечә-күндүз азаб тартип йүргән мәрйәм абдулһәмид мухбирға: "бу дуняда адаләт нәгә кәтти? қизимни ойлап сараң болай дедим. Әң кичик балам дадисини техи көрмиди. Балилирим йенимға әкилишкә күчүм йәтмәйду, чидиғучиликим қалмиди, әгәр иманим йол қойған болсиди, аллибурун өлүвалған болаттим" дегән.

Көзәтчиләрниң қаришичә, хитайниң уйғурларға йүргүзүватқан җинайити пүтүн дуняни қаплиған болуп, уйғур диярида азаб тартиватқан уйғулардин башқа,

Чәтәлдә яшаватқан уйғурларму охшашла қериндашлириниң дәрдидә азаб чәкмәктә икән. Ата-анисидин айрилған пәрзәнтләрниң "ата-анам қени?" дәп чоқан көтүрүши, балилиридин айрилған ата-аниларниң "балилирим қени" дәп налә-пәряд қилиши вә уларниң хитай консоллири алдида намайишқа чиқиши хитайниң инсан қелипидин чиққан рәзил сиясити вә қорқунчлуқ маһийитини дуняға көрситип беридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт