Америка дөләт мәҗлиси хитай ишлири иҗраийә комитети хитайдики қийин-қистақ әһвалини тәкшүрүшни тәләп қилди

2022.04.22
Share on WhatsApp
Share on WhatsApp

Америка дөләт мәҗлиси хитай ишлири иҗраийә комитети әзалиридин җеф меркли (Jeff Merkley), җәмес мәкгаверн (James McGovern), там малиновиски (Tom Malinowski), томас сөзи (Thomas Suozzi) қатарлиқлар бирләшкән дөләтләр тәшкилати тән җазасини чәкләш комитетиниң рәиси клавуд һиллер (Claud Heller) ға хәт йезип, хитайда болуватқан вәһший қийин-қистақ, тән җазалирини қаттиқ тәкшүрүшни кәйнигә сүрмәсликни тәләп қилған.

Б д т тән җазасини чәкләш комитети 2015-йил хитайдики тән җазасини тәкшүргәндин буян хитайдики кишилик һоқуқ әһвали, болупму уйғур районидики қәбиһ зулум наһайити еғирлишип кәткән болуп, америка дөләт мәҗлиси хитай ишлири иҗраийә комитети әзалири буниңға йеқиндин диққәт қилған һәмдә мәсилиниң тәхирсизликини тонуп йетип, мәзкур комитетни дәрһал һәрикәткә өтүшкә чақириқ қилған.

Бу хәттә көрситилишичә, хитай һөкүмити мәһбусларни қийнаш әһвали һәққидики доклатини 2019-йил 12-айдин бурун б д т тән җазасини чәкләш комитетиға йоллиши керәк болсиму техи йоллимиған.

Бу хәттә, түрмидин қутулуп чиқалиған шаһитларниң баянлири билән берилгән пакитлар асас қилинған һалда, уйғур аптоном районидики зор көләмлик лагер, қамақхана вә түрмиләрдә мәһбусларни қийнашниң омумйүзлүк һадисә икәнлики, зорлап иқрар қилдуруш әһвалиниң еғир икәнлики, бәзи мәһбусларниң тән җазасидин өлгәнлики яки мейип болғанлиқи һәққидики мәлуматлар көрситилгән һәмдә хитай һөкүмити бу әһвални йошуруватқан әһвалда б д т тән җазасини чәкләш комитетиниң уни җәзмән тәкшүрүши керәклики тәкитләнгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт