Камран бухарий: «америка һөкүмити хитайниң оттура асияда иккинчи русийә болувелишини чәклиши лазим!»

Мухбиримиз әзиз
2019-08-20
Елхәт
Пикир
Share
Принт

Хитай рәиси ши җинпиң бу йил яз айлиридин буян хизмәт зиярити вә шаңхәй һәмкарлиқ тәшкилатиниң йиғинлири сәвәбидин явро-асия қуруқлуқида, болупму оттура асия районида көп қетимлап зиярәттә болди.

Вашингтон шәһиридики «йәр шари сиясити мәркизи» ниң директори камран бухарий бу һадисиләрни тасадипий ишлар әмәс, дәп қарайду һәмдә «хитай мушундақ қилип йүрүп русийәниң оттура асия районидики символлуқ орниға чиқишниң қәстигә чүшмәктә» дәп көрситиду.

Униң бу һәқтики мақалисидә көрситилишичә, хитай һөкүмити нөвәттики «бир бәлвағ бир йол қурулуши» арқилиқ өзлириниң оттура асия районидики иқтисадий тәсирини тездин ашурмақта икән. Болупму русийәниң оттура асиядин тәдриҗий чекинип чиқиши билән пәйда болған тәсир күчи бошлуқини хитай мәбләғ селиш шәклидә толдурушниң койиға чүшмәктикән. Америка үчүн толиму оң келиватқан мушундақ бир пурсәтни қолдин берип қоюш маһийәттә хитайниң қуруқлуқтики йәнә бир тәһдит болушиға йол қойғанлиқ болидикән.

Апторниң пикричә, оттура асиядики иқтисадий тәрәққиятта бир қәдәр зор илгириләшни қолға кәлтүргән қазақистанниң нефит експорти вә йеник санаәт буюмлири импорти асасий җәһәттин хитай билән болидиған содиниң мутләқ көп қисмини тәшкил қилидикән. Йәнә бир яқтин қазақистан изчил һалда өзини русийәдин узақлаштурушқа тиришип кәлмәктикән. Буниң бир рошән ипадиси болса уларниң славиян елипбәсидин латин елипбәсигә көчүшидә ипадилинидикән.

Бухарий бу мәсилә һәққидә тохтилип: «қазақистан һөкүмити шуниң билән бир вақитта хитайниң тәсириниму анчә халап кәтмәйду. Улар пәқәт хитайниң иқтисадий җәһәттики қуввитидин өз пайдисиға пайдилинишни көзлимәктә» дәп көрситиду. У бу һәқтики әһвалларни омумлаштуруп назәрбайеф һөкүмитиниң москва билән бейҗиң оттурисидики тәңпуңлуқни сақлашқа тиришип кәлгәнликини, әмди униң орниға чиққан тоқайеф һөкүмитиниң болса американиң ярдимидә нөвәттики сиясий җуғрапийәлик өзгириштин оңушлуқ өтүвелишқа тиришиватқанлиқини әсләп өтиду. Шундақла қазақистанниң давам қиливатқан сиясий вә иқтисадий ислаһатлири җәрянида тоқайеф һөкүмити хитай билән болидиған һәмкарлиқни давам қилдурувәрсә, хитайниң русийәниң орниға чиқип оттура асиядики әң чоң зомигәр болуп қелишиға йол ечилидиғанлиқини, буниң болса америкиниң оттура асиядики мәнпәәтлири үчүн еғир тәһдитниң башлиниши болуп қалидиғанлиқини тәкитләйду.

Аптор мушу әһваллар һәққидә хуласә чиқирип: «һазир америка үчүн әң яхши чарә қазақистанниң сиясий вә иқтисадий ислаһатлириниң оңушлуқ болуши үчүн уни техиму зор күч билән қоллаш, шу арқилиқ хитайниң оттура асиядики йеңи һөкүмран күч болувелишиниң алдини елиш» дәйду.

Пикирләр (0)
Share
Толуқ бәт