Diplomat tori dunyani xitayning medeniyet qirghinchiliqigha yol qoymasliqqa ündigen

Muxbirimiz sada
2018-10-23
Élxet
Pikir
Share
Print

Yéqinda "Diplomat" torigha "Xitayning medeniyet qirghinchiliqi we döletning wijdani" namliq bir muhakime maqalisi bésilghan bolup, uningda xitayning Uyghur diyarigha yürgüzüwatqan medeniyet qirghinchiliqi we hakimmutleqliq tüzümi muhakime qilin'ghan.

Maqalining bashlanmisida amérika dölet mejlisi qarmiqidiki xitay ishliri komitéti élan qilghan yilliq doklat tilgha élin'ghan. Doklatta béyjing da'irilirining Uyghur diyaridiki az sanliq milletlerge qarita yoqitish xaraktérlik irqiy qirghinchiliq herikitini yolgha qoyghanliqi tekitlep ötülgen.

Maqale aptori bén lowsén mezkur maqaliside xitay re'isi shi jinpingning maw zédung dewridin "Miras" qalghan irqiy qurutush programmisini dawamlashturuwatqanliqini nuqtiliq eskertken. Uning bayanliridin melum bolushiche, bir milyondin artuq ademning atalmish "Jaza lagérliri" gha qamilishi xitayning irqiy qurutush tarixidiki intayin zor miqdardiki san hésablinidiken.

Maqalide yene "Washin'gton pochtisi" gézitining Uyghur diyarigha qarita xelq'araliq tekshürüsh élip bérish heqqidiki telipimu tilgha élin'ghan. Maqale aptori mezkur teklipke qarita öz köz-qarishini bayan qilip, eger dunya bundaq weziyetni iz qoghlap tekshürmise, bu xitayning irqiy tazilishigha yol qoyghanliq bolup hésablinidighanliqini alahide eskertkech, xelq'arani tézdin heriket qollinishqa ündigen.

Bén lowsin shu qatarda yene amérika dölet mejlisige teklip bérip, xitay irqiy tazilash herikitini toxtatquche, uninggha éghir iqtisadiy jaza qollinishning munasipliqini körsitip bergen. U yene munularni qeyt qilghan: "Xitay hökümitige qarita hemme cheklimini birla waqitta ijra qilish belkim emeliyetke uyghun bolmasliqi mumkin, emma amérika xitaygha jazaning temini tétish üchün waqit bérishi kérek."

Bén lowsén maqalisining axirida pütün dunyadiki démokratlargha chaqiriq qilip, xitayning bésimigha uchrawatqan Uyghur, qazaq we bashqa az sanliq milletlerni qoghdashni heqiqiy emelge ashurushqa, xitayning qiliwatqan xataliqliri üchün qol qoshturup qarap turmasliqqa dewet qilghan.

Toluq bet