Érik abétz: “Xitay hazir natsistlar bash kötürgen waqitlardiki ishlarni qiliwatidu!”

Xitay hökümitining 2022-yilidiki qishliq olimpik musabiqisige sahibxaniliq qilishi yéqinqi mezgillerdin buyan izchil tenqid obyékti bolup kéliwatqanidi. 16-Noyabir küni “Awstraliyelikler” géziti awstraliye parlaméntining kéngesh palata ezasi érik abétz nöwette Uyghurlarning zor kölemlik tutqun'gha duch kélishi hemde xongkongdiki démokratiye namayishlirining basturulushini alahide tekitligen halda “Bu hal 1936-yili natsistlar gérmaniyesining bérlin olimpik musabiqisige sahibxaniliq qilghinigha neqeder oxshaydighan bir weqe” dep körsetti. U sözide eyni waqitta gérmaniye bilen iqtisadiy alaqide bolghan döletlerning natsistlar ijra qiliwatqan lagérlar we irqiy ziyankeshlik qilmishlirini körmeske séliwalghanliqi hemde shu arqiliq özlirining yanchuqini tompaytishning koyida bolghanliqini yene bir qétim esletti.

Awstraliye parlaméntining kéngesh palata ezasi réks patrikmu awstraliye hökümitini béyjing olimpik musabiqisini bayqut qilishqa chaqirdi. U eyni waqitta adolf gitlérning yehudiylarni olimpik musabiqisige qatnishishtin men'i qilghanliqi, shuningdek xelq'ara jem'iyetning bérlin olimpik musabiqisini bayqut qilishni ret qilghanliqini tekitlep “Bundaq hadise bizning zamanimizda yene bir qétim tekrarlanmasliqi lazim. Bolupmu awstraliye tenheriketchiliri we awstraliyening bayriqi qirghinchiliq qiliwatqan bir dölettiki olimpik musabiqisining sehnisidin orun almasliqi lazim” dégen.

Kéngesh palata ezasi abétz xitayning yéqindin buyan awstraliye bilen bolghan alaqiside “Iqtisadiy jehettin qisish” kozirini oynawatqanliqini tilgha élip “Xitay hazir dunyagha ‛bizning wehshilikimizni tosmaqchi bolsang, bizdiki kishilik hoquq mesililirini pash qilmaqchi bolsang biz sanga iqtisadiy jaza bérimiz‚ dégen uchurni yollawatidu” dégen. Shundaqla milyonlap kishi lagérgha qamiliwatqan mushundaq jiddiy peytte heqiqet üchün diplomatik éhtiyajni waqtinche biryaqqa qayrip qoyushning zörürlükini tekitligen.

Melum bolushiche, érik abétz ependi ilgiri awstraliye hökümitide pewqul'adde ishlar ministiri we béliqchiliq we ormanchiliq ministiri qatarliq wezipilerni ötigeniken.