Blumbérg: "Xitayning musulmanlarni basturushining bash arxitéktori"

Muxbirimiz eziz
2018-09-28
Élxet
Pikir
Share
Print

Amérikining "Blumbérg xewerliri" agéntliqi 27‏-séntebir maqale élan qilip, xitayning Uyghur musulmanlirini basturushida Uyghur aptonom rayonluq partkom sékrétari chén chüen'goning "Bash arxitéktorluq" rol oynawatqanliqi, uning herikiti xitay re'isi shi jinpingning qollishigha érishiwatqanliqini ilgiri sürdi.

"Shi jinpingning qol astida parlighan yultuz‏- xitayning musulmanlarni basturushining arxitéktori" serlewhilik maqalida, "Chén chüen'go xitay bilen gherbning qimmet qarishidiki hangning chongiyishida rol oynawatqan shexs", dep körsitilgen.

Maqalida, chén chüen'goning xénenlik bir yétimdin qandaq qilip Uyghur aptonom rayonluq partkom sékrétarliqi we kompartiye siyasiy byurosining ezaliqigha öskenliki heqqide etrapliq toxtalghan.

Maqalida ilgiri sürülüshiche, chén chüen'goning Uyghur rayonidiki qilmishi we shi jinpinggha sadaqetmenlik bildürüshi, uning ötken yili siyasiy byurogha kirishige yol achqan.

Xewerde, u 2023‏-yili kompartiye siyasiy byurosining da'imiy komitétigha kirishi perez qiliniwatqan shexslerning biri ikenliki tekitlen'gen.

Mezkur maqale amérika hökümitining chén chüen'go bashchiliqidiki bezi xitay emeldarlirini jazalap, ularni jawabkarliqqa tartishini ilgiri sürülüwatqan mezgilde élan qilin'ghan. Bu yil 8‏-ayda amérika awam we kéngesh palatasining 17 neper ezasi chén chüen'go, sün jinrong, juxeylün, shöhret zakir qatarliq xitay emeldarlirini jazalashni telep qilghan idi. "Blumbérg xewerliri" ning maqaliside qeyt qilinishiche, amérikining chén chüen'gogha qaratqan herqandaq bir émbargosi, xitayda uning Uyghur aptonom rayonigha bolghan "Igilik hoquq" endishisini kücheytidiken.

Maqalida amérika jorjitown uniwérsitétining proféssori jeymis milwardning sözi neqil keltürülüp, chén chüen'goning qattiq bixeterlik tedbirliri we qayta terbiyelesh lagérliridin ibaret qosh istratégiyesi puqralardiki étnik perqni yoqitishni nishan qilghanliqi, buningda "U shi jinpingning körünerlik derijide qollishigha érishkenliki" bildürülgen.

Toluq bet