Xitayning dunyagha yéyiliwatqan nazaret sistémisi eng deslep Uyghur élida sinaq qilin'ghan

Muxbirimiz irade
2018-04-25
Élxet
Pikir
Share
Print

Bügün amérikidiki "Erkinlik sariyi" dunyadiki herqaysi döletlerning axbarat-uchur erkinlik ehwali heqqide élan qilghan doklatida xitaydiki intérnét torigha qaritilghan qamal we yuqiri téxnikiliq nazaret sistémilirining yéngi bir pellige kötürülgenlikini bildürdi.

Mezkur organning bildürüshiche, xitay hökümiti 2017-yili ichide "Tor bixeterliki qanuni" we shuningdek bashqa qanun-tüzümler arqiliq intérnét ‏we uchurni yenimu ilgirilep qamal astigha alghan. Yuqiri pen-téxnikining imtiyazliridin paydilinip, puqralargha qaratqan nazaritini yenimu kücheytken.

"Erkinlik sariyi" ning tetqiqatchisi sarah kuk xanim charshenbe küni "Diplomat" zhurnilida élan qilghan maqaliside xitaydiki pütün bu qamal sistémilirining aldi bilen Uyghur élida sinaq qiliniwatqanliqini tekitlidi. U maqaliside Uyghur élini xitaydiki nazaret sistémilirining "Tuxum bésish mashinisi" dep teswirlidi.

U, xitay hökümitining yuqiri téxnikiliq chiray tonush kaméraliri, jasusluq epliri qatarliq nurghun yuqiri téxnikilarni aldi bilen Uyghur diyarida sinaq qilghanliqini, hazir bu téxnikilarni pütün memliket miqyasida kéngeytiwatqanliqini, hetta bundaq qamal téxnikilirini dunyagha éksport qilishqa bashlighanliqini bildürgen.

Sarah kuk xanim maqaliside yuqiriqi bu tehditning nöwette amérika we yawropa ellirining diqqitini qozghighanliqini, bezi döletlerning buninggha qarshi tedbir élishqa bashlighanliqini, amérika hökümitining yéqinda xitaydiki "Xu'awéy" we "Jongshin" qatarliq shirketler ishlepchiqarghan mehsulatlarning amérika bazirigha kirishini chekligenlikini bildürgen.

Toluq bet