Xitay tunji qétim özining iqtisadiy éshish nishanidin waz kechti

Xitay hökümiti özining 40 yilliq iqtisadiy tereqqiyat tarixida tunji qétim özining iqtisadiy éshish nishani belgileshtin waz kechkenlikini élan qildi. Xitay bash ministiri li kéchyang 22-may küni xitay xelq qurultiyining memliketlik yighinida doklat bérip, 2020-yili iqtisadi tereqqiyatning éshish nishanini belgilimeydighanliqini jakarlighan. “Jenubiy xitay seher pochtisi” gézitining xewer qilishiche, xitay iqtisadi wuxende partlighan korona wirusi yuqumining bésimida bu yilning deslepki charikide 6.8% Töwenligen.

Xitay hökümiti bu yilliq iqtisadiy éshish nisbitini belgilimigen bolsimu, lékin u yenila herbiy xam chotini 6.6 %, Bixeterlik xam chotini 5.6 % Köpeytken. Buning bilen xitayning bu yilliq herbiy xam choti bir tirilyon 260 milyard yüen'ge chiqqan. Li kéchyangning tekitlishiche, xitay hökümiti bu yil korona wirusi yuqumi, soda-iqtisadning chékinishi, ishsizliq qatarliq amillar seweblik bir tirilyon yüenlik alahide zayom tarqitidiken.

U doklatida, “Biz yer shari xaraktérlik yuqum, soda-iqtisattiki zor éniqsizliq tüpeyli konkrét(ichki ishlepchiqirish omumi qimmiti) nishanini békitmiduq. Xitayning tereqqiyati mölcherligili bolmaydighan amillarning tesirige uchrimaqta” dégen. Xitayning bu nöwetlik xelq qurultiyi yighini xitay wuxende partlighan korona wirusini “Dunyagha tarqitip”, dunya iqtisadining buzghunchiliqqa uchrishi, nurghun insanning ölüshige keltürüp chiqirish bilen eyibliniwatqan, uning jawabkarliqini sürüshtürüsh we tölem tölishi telep qiliniwatqan mezgilde ötküzülgenidi.