En'gliye hökümiti 2022-yilliq béyjing qishliq olimpikini bayqut qilishqa chaqirildi

Muxbirimiz irade
2020-08-20
Share

En'gliyelik tonulghan siyasiyon we sabiq emgek we ijtima'iy parawanliq ministiri i'in dankan simis xitayning 2022-yilliq qishliq olimpik musabiqisige sahibxaniliq qilishigha naraziliq bildürgen we en'gliye hökümitini béyjingning olimpik ötküzüshige qarshi heriket qilishqa chaqirghan.

En'gliyediki "Express" gézitining xewer qilishiche, sabiq ministir i'in simis 1980-yili sabiq sowét ittipaqi sahibxaniliq qilghan olimpik musabiqisining amérika teripidin bayqut qilin'ghanliqini xatirilitip, xuddi sabiq sowét ittipaqigha oxshash heriket qiliwatqan xitayningmu bayqut qilinishi kéreklikini bildürgen.

U xitayning xelq'araliq erkin bazar qa'idilirige xilapliq qiliwatqanliqi, xu'awéy shirkiti arqiliq heqsiz riqabet peyda qiliwatqanliqi, hetta tajsiman wirus yuqumining sewebi üstide tekshürüsh élip bérishni telep qilghanliqi üchün awstraliye hökümitige tehdit salghanliqini tilgha élip, xitayning xalighanche heriket qilishigha yol qoyulmasliqi kéreklikini eskertken.

"Express" géziti öz xewiride sabiq ministirning bu sözining del chet'ellerdiki Uyghur teshkilatliri xelq'ara olimpik komitétini 2022-yilliq qishliq tenheriket musabiqisini béyjingda ötküzüsh qararigha qayta qarap chiqishqa chaqirghan mezgilge toghra kelgenlikini bildürgen. Xewerde bir milyondin artuq Uyghur we bashqa musulman türkiy xelqlerning hazir xitay hökümiti teripidin lagérlargha qamalghanliqi eskertilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet