Рик скот: "олимпик комитетини хитайниң қишлиқ олимпикқа саһибханилиқ қилиш салаһийитини бикар қилишқа мәҗбурлайдиған қарар лайиһәси дәрһал мақуллиниши керәк"

Мухбиримиз ирадә
2020-10-08
Share

Америка кеңәш палата әзаси рик скот уйғурларға зулум қиливатқан хитайниң 2022-йиллиқ қишлиқ олимпик мусабиқисигә саһибханилиқ қилишини бикар қилиш үчүн олимпик комитетиға бесим ишлитидиған қарар лайиһәсиниң дәрһал мақуллинишини тәләп қилди.

"төпилик" (The Hill) ториниң хәвәр қилишичә, сенатор рик скот бу һәқтә кеңәш палатаси ташқи мунасивәтләр комитетиға язған хетидә мундақ дегән: "хитай баш секретар ши җинпиң бу мәсулийәтсизләрчә һәрикитини давамлаштуридикән, у һалда коммунист хитай һакимийитини 2022-йиллиқ олимпик тәнһәрикәт мусабиқиси билән тартуқлашқа һәргиз болмайду. Мән дунядики рәһимсиз мустәбитләр тәрипидин езиливатқанларға қарши демократик күрәштә мән билән бир сәптә икәнликиңларни билимән. Мән қарар лайиһәсини мақуллап, коммунист хитайниң қилмишини әйиблишиңларни һәмдә хәлқара олимпик комитетини 2022-йиллиқ олимпик тәнһәрикәт мусабиқиси үчүн йеңи саһибхана тепишқа мәҗбурлишиңларни сораймән."

Америка кеңәш палата әзаси рик сикот бу йил 3-айда хәлқара олимпик комитетиға уйғурларни кәң көләмдә тутқун қилип йиғивелиш лагерлириға қамаватқан хитай һакимийитигә берилгән саһибханилиқ һәққини бикар қилиш һәққидә бесим ишлитидиған қарар лайиһәсини музакиригә сунған болуп, бу қарар лайиһәсигә 12 нәпәр кеңәш палата әзаси қол қойған.

Нөвәттә хәлқарада хитай саһибханлиқидики қишлиқ олимпикни байқут қилишла әмәс, бәлки уни пүтүнләй бикар қилиш һәққидики чақириқлар күчәймәктә. Алдинқи айда 160 дин артуқ кишилик һоқуқ тәшкилати хәлқара олимпик комитетидин қишлиқ тәнһәрикәт мусабиқисиниң саһибханини алмаштурушни тәләп қилған. Нөвәттә америкадин башқа әнглийә вә явропа иттипақидики һөкүмәт әмәлдарлири арисидиму бу мәсилә диққәт нуқтисиға айланмақтикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт