Teywen sherqiy türkistan jemiyiti xelq'ara olimpik komitétining béyjing qishliq olimpik musabiqisini bikar qilishini telep qildi

Teywen sherqiy türkistan jem'iyiti xelq'ara olimpik komitétini xitayning Uyghurlarni qirghin qilishi seweblik 2022-yilliq béyjing qishliq olimpik musabiqisini bikar qilishqa chaqirghan. Bu chaqiriqni teywen sherqiy türkistan jem'iyitining diréktori xé chawdong 19-öktebir “Teybéy waqti” gézitide élan qilghan chaqiriqida otturigha qoyghan. Uning tekitlishiche, eger xelq'ara olimpik komitéti musabiqini bikar qilmisa, u keng kölemlik bayqut qilinishdin qéchip qutulalmaydiken. Xé chawdong bu chaqiriqni xelq'arada béyjing qishliq olimpik musabiqisini bayqut qilish chaqiriqi barghanséri ewji éliwatqan mezgilde élan qilghan.

U mundaq dégen: “Biz xitay chégrasi ichidiki barliq étnik milletlerning diniy erkinliki, kishilik hoquqidin endishe qiliwatqan kishilerni xelq'ara olimpik komitétigha 2022-yilliq béyjing qishliq olimpik musabiqisini bikar qilish toghrisida dawamliq bésim ishlitishke charimiz. Eger xelq'ara olimpik komitéti uni bikar qilmisa, u musabiqining keng kölemlik bayqut qilinishidin qéchip qutulalmaydu. U dunya sehiye teshkilatigha oxshash 2-shermende xelq'ara teshkilat bolup qalidu”.

Xé chawdongning tekitlishiche, béyjing hökümiti nurghun pul serp qilip, xitayda nopusning köpiyishi eng téz bolghan shinjangdek bir rayonni 2-3 yil ichide xitaydiki nopusning köpiyishi eng asta rayon'gha aylandurup qoyghan.

Xe chawdong “Teybéy waqti” gézitidiki “Uyghurlargha irqiy qirghinchiliq boluwatqanda olimpik yoq” mawzuluq chaqiriqida, “Nöwette xelq'ara jama'ette Uyghurlar xitay kompartiyesi da'irliri teripidin sadir qilin'ghan irqiy qirghinchiliqning qurbanliri deydighan ortaq tonush shekillendi” dégen.