Xitay Uyghur élini “Qishliq tenterbiye menzili” dégen teshwiqat bilen bazargha sélishqa bashlighan

Muxbirimiz erkin
2022-01-19
Share

Béyjing qishliq olimpikining yétip kélishige egiship, xitay “Irqiy qirghinchiliq rayoni” dep atalghan Uyghur éligha chet el shirketlirini we téximu köp xitay sayahetchilirini jelp qilish üchün, bu rayonni “Qishliq tenterbiyening köngüldikidek menzili” dep bazargha sélishqa bashlighan. BBC Ning 17-yanwar bergen bu heqtiki xewiride éytilishiche, gherb döletliri xitayning bu rayondiki musulmanlargha irqiy qirghinchiliq qilghanliqini éytishigha qarimay, nurghun chet el shirketliri bu bazarning bir parchisi bolushqa aldirmaqta iken.

Xewerde bu chet el shirketlirining biri-amérikadiki “Burton” namliq dangliq qishliq tenterbiye buyumliri shirkiti ikenliki, uning altayda bir qishliq tentertbiye buyumliri mulazimet merkizi achqanliqini bildürgen. BBC Ning éytishiche, burton shirkitining xitaydiki tarmiqining mes'uli kréyig simis, xitay bu rayonda kishilik hoquq depsendichiliki bilen eyipliniwatqan bolsimu, biraq bu rayon bilen soda qilishni ret qilip, özini cheklep qoyushni xalimaydighanliqini éytqan.

U taratqularning bu rayondiki ziyankeshlikke a'it xewerlerni oqughanliqini étirap qilghan bolsimu, biraq qiyin-qistaq, gheyriy insaniy we kemsitish xaraktérlik mu'amililerheqqidiki eyibleshlerge qarita “Belkim shundaq bolushi mümkin… biraq men siyasetchi emes, men buni héchqachan tetqiq qilip baqmidim,” dep jawap bergen.

Kréyg simis bu sözlerni aqsaray amérika shirketlirini xitayning “Irqiy qirghinchiliq rayoni” bilen soda qilmasliqqa chaqiriwatqan bir waqitta qilghan. BBC Ning éytishiche, nöwette xitay da'iriliri qishliq olimpiktin paydilinip, Uyghur éli qatarliq jaylarda qishliq tenterbiye sayahitini janlandurush herkiti qozghighan. Xewerde shi jinpingning 300 milyon xitay puqrasini “Shinjanggha bérip qar téyilish” qa chaqirghanliqi tekitlen'gen.

Amérikaning sabiq tramp hökümiti 2021-yili del 1-ayning 19-küni, yeni wezipidin ayrilishtin bir kün awwal, xitayning Uyghurlargha “Irqiy qirghinchiliq” qiliwatqanliqini élan qilghan idi. Arqidin baydén hökümitimu xitayning “Irqiy qirghinchiliq” qilghanliqini étirap qildi. Her ikki hökümet amérika shirketlirini Uyghur rayonidin yiraq turushqa chaqirip kelgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet