Хитай өй-мүлүк базиридики киризис хитайдики оттура қатлам аилиләргә қаттиқ зәрбә болған

Вашингтондин мухбиримиз әркин тәйярлиди
2023.12.18

Хитайниң өй-мүлүк базиридики киризис, хитайдики оттура қатлам аилиләрниң турмуш сәвийәсигә зәрбә берип, уларни аилә кирими һәққидә қайта ойлинишқа мәҗбур қилмақта икән.

“блумберг иқтисадий хәвәрлири”дә, хитайниң өй-мүлүк базирини тәртипкә селишиниң 5 милйон кишиниң ишсиз қелишини кәлтүрүп чиқириши мумкинлики билдүрүлгән. Хәвәрдә баян қилинишичә, нөвәттә хитайда пай чекигә мәбләғ селиш 30 пирсәнт, кишиләрниң мааши 30 пирсәнт, өй-мүлүккә мәбләғ селиш 20 пирсәнт төвәнлигән болуп, хитайниң өй-мүлүк вә пай чеки базиридики касатчилиқ оттуриһал аилиләрниң байлиқини йоқ қилған.

Хәвәрләрдә, корона вируси юқуми қамилидин кейин, иқтисадни әслигә кәлтүрүштә қийниливатқан хитайниң, әмдиликтә күнсери ешип бериватқан ишсизлиқ хәвпигиму дуч келиватқанлиқи тәкитләнмәктә.

“блумберг иқтисадий хәвәрлири” ниң ейтишичә, хитайдики аилиләрниң 70 пирсәнтиниң мал-мүлки өй мүлүккә бағлинишлиқ болғачқа, өй-мүлүк базириниң касатлишиши, аилиләрниң шәхсий байлиқиниң азийишиниму кәлтүрүп чиқармақта икән. Хәвәрдә, өй-мүлүк баһаси һәр қетим 5 пирсәнт чүшсә, өй-мүлүк байлиқидин 2 тириллийон 700 милярд долларниң йоқилидиғанлиқи билдүрүлгән. Бәзи мутәхәссисләр, “блумберг иқтисадий хәвәрлири” гә ейтқан сөзидә, “бу алдимиздики йилларда техиму көп байлиқниң йоқилишидики бир башлиниш болуп қелиши мумкин” дейилгән. Хәвәрдә қәйт қилинишичә, 2026-йилға барғанда, өй-мүлүк игиликиниң хитай ички ишләпчиқириш омумий қиммитидә игилигән нисбити, һазирқи 20 пирсәнттин 16 пирсәнткә чүшүп қелиши мумкин болуп, бу 5 милйон кишиниң яки омумий шәһәр нопусиниң 1 пирсәнтиниң ишсиз қелиши вә яки кириминиң азийиш хәвпини пәйда қилидикән.

“җәнубий хитай әтигәнлик почтиси” гезитиниң 17-декабир бәргән хәвиридә, хитай мәбләғ башқуруш фондлири әһвалиниңму интайин начар икәнликини билдүргән. Хәвәрдә ейтилишичә, бу йил хитайдики 90 пирсәнт мәбләғ башқуруш фонди зиян тартқан, бу фондлар 2023-йили бир тириллийон долларлиқ базар қиммитини йоқатқан. Хәвәрдә, 941 хитай мәбләғ башқуруш фондиниң ичидә пәқәт 70 ниң пайда алғанлиқи қәйт қилинмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.