Xitay konsulxanisining “Hijab échish” chaqiriqi pakistanda keskin tenqidlendi

Muxbirimiz eziz
2021-03-09
Share

“8-Mart ayallar bayrimi” küni xitay hökümitining pakistandiki bash elchixanisining medeniyet meslihetchisi jang xéching özining tiwéttér bétide “Hijabingni échiwet, közliringni men körey. Shinjang ussuli” dégen mawzuda yérim-yalingach bir xitay qizning ussul oynighan widiyosini chiqarghan. Emma aridin héchqanche ötmeyla buninggha qarshi qar-yamghurdek inkaslar yézilip, pakistanda qattiq ghulghula peyda qilghan.

Bu heqte chüshken inkaslarning hemmisila dégüdek xitay elchixanisining aliy derijilik meslihetchisi bolghan bir xadimning musulmanlar dölitide “Hijabingni ach” dep chaqiriq qilishini musulmanlargha qilin'ghan éghir haqaret, dep qarighan. Shundaqla mushundaq bir kalwa emeldarning qandaq bolup elchixanida medeniyet meslihetchisi bolup ishleydighanliqigha so'al qoyghan. Yene beziler bolsa “Xitay hazir musulmanlarning hijabini yoq qiliwatidu. Buni bizning döli'itmizge élip kélishingge ruxset yoq!” dep xitab qilghan.

“Pakistan waqti” gézitining 9-marttiki xewiride éytilshiche, jang xéching shu künila tiwéttér bétidiki bu uchurlarni yuyuwetken. Emma uning tiwittér bétining ékran yüzini süretke éliwalghanlar bu süretlerni bashqilar bilen köplep hembehirligen. Shundaqla “Bu kalwa emeldarning qilmishini béyjinggha melum qilip qoyayli!”, “Bu saman qorsaqni pakistandin heydep chiqirayli” dep til salghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet