Америка һөкүмити хитайниң почта системисидики имтиязиға зәрбә бәрмәкчи

Мухбиримиз әзиз
2018.10.18

Америка билән хитай оттурисидики сода урушиниң чуқанлири бесилмайватқанда америка һөкүмити бир йерим әсирдин буян давам қилип келиватқан хәлқара почта системисидин чекинип чиқмақчи болуватқанлиқини һәмдә почта һәққи тоғрисидики сиясәтни өзгәртмәкчи болуватқанлиқини җакарлиди.

Мәлум болушичә, мәзкур почта системисиниң бәлгилимиси бойичә, хитайдин америкида әвәтилидиған посулкиларниң почта һәққи һазирға қәдәр изчил әң төвән почта һәққи өлчими бойичә һесаблинип келингән икән.

Бу һәқтики муназириләрниң көпийишигә әгишип, ақ сарайдики алақидар хадимлар йеқинда буниң “тәңсиз баһани түгитиш” ни мәқсәт қилидиғанлиқини, америка һөкүмитиниң пат арида йеңидин почта һәққини бекитип чиқидиғанлиқини билдүргән. “вол-стрет журнили” гезитиниң бу һәқтики баш мақалисидә көрситилишичә, илгирики баһа өлчимидә хитайдин америкиға әвәтилидиған посулкиларниң почта һәққи охшаш посулкиниң америка тәвәсидики бирәр искилаттин башқа бир шәһәргә почтидин әвәтилиш һәққидин көп әрзанға чүшидикән. Буниң билән хитайдики завутларниң маллири америка завутлириниң мәһсулатлириға қариғанда америка базирида нәччә һәссә көп сетилидикән. Бу болса америка завутлириниң оборот миқдариға еғиз зиянларни салмақта икән.

Йәнә бир яқтин, әрзан почта һәққи түпәйлидин хитайдин көплигән сахта вә сүпәтсиз малларму америка базириға еқип кирмәктә икән. Буниңға қошулуп бир қисим қанунсиз буюмлар вә зәһәрлик чекимликләрниңму почта системиси арқилиқ америкиға тарқилишиға йол ечилғанлиқи мәлум.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.