Uyghur aptonom rayoni ichkiridin kelgen T307 nomurluq poyizdiki xitaylarning özini melum qilishini telep qildi

Muxbirimiz erkin
2020-01-27
Élxet
Pikir
Share
Print

Uyghur aptonom rayoni da'iriliri 26‏-yanwar küni uqturush chiqirip, 19‏-yanwar küni wuxenning wuchang poyiz békitide T307 nomurluq yoluchilar poyizining 8‏-wagonida olturup Uyghur rayonigha chiqqan xitaylarning derhal özini melum qilishini telep qilghan.

Xitay hökümiti "Wuxen wirusi" ni 31‏-dékabir küni dunya sehiye teshkilatigha melum qilghan bolsimu, lékin Uyghur aptonom rayoni da'irilirining wuxendin yolgha chiqqan yoluchilar poyizigha qarita bixeterlik tedbirlirini almighanliqi melum emes.

Melum bolushiche, 19‏-yanwar küni wuxenning wuchang poyiz békitide T307 nomurluq yoluchilar poyizining 8‏-wagonigha chiqip, 20‏-yanwar gensudiki longshi békitide chüshüp qalghan bir xitay yoluchining "Wuxen wirusi" da yuqumlan'ghanliqi bayqalghan. "Ürümchi kechlik géziti" ning xewer qilishiche, nöwette ürümchi sheherlik yéngi tiptiki öpke yallughi wirusidin mudapi'e körüsh qomandanliq shtabi T307‏ nomurluq yoluchilar poyizining 8‏-nomurluq wagonida ürümchige kelgen yoluchilarning derhal özi turushluq orunlardiki ahaliler komitéti, idare yaki méhmanxana da'irilirige özini melum qilishi yaki 12345 nomurgha téléfon qilip, özini tizimgha aldurushini telep qilghan. Uqturushta yene bu kishilerning talagha chiqmasliqi, a'ilide karantin'gha élinishi, eger normalsiz ehwal körülse derhal belgilen'gen dawalash ornigha bérishi telep qilin'ghan.

Xitay hökümiti ötken hepte wuxen shehirini qamal qilip, uninggha kirish-chiqishni chekligen bolsimu, xewerlerde 11 milyonluq wuxen shehiridiki 5 milyon kishining bu sheherdin chiqip ketkenliki ilgiri sürülmekte. Nöwette, bu kishilerning qaysi ölke, rayonlargha tarqalghanliqi melum emes iken. "Tengritagh" torining 27‏-yanwar xewer qilishiche, da'iriler 26‏-yanwargha qeder Uyghur rayoni miqyasida 5 kishining "Wuxen wirusi" bilen yuqumlan'ghanliqi, ularning 4 ning ürümchide, birining ili oblastida ikenlikini bildürgen. Bezi mutexessisler wirusning mahiyiti seweblik uning kelgüsi bir qanche heptide partlash xaraktérlik köpiyishi mumkinlikini perez qilmaqta.

Toluq bet