Америка-хитай сода уруши нәтиҗисидә йүәнниң қиммити әң төвән орунға чүшүп қалған

Мухбиримиз ирадә
2018-07-12
Елхәт
Пикир
Share
Принт

Трамп һөкүмити хитайға қойған 30 милярд долларлиқ чегра беҗи өткән җүмә күни ишқа киришкән иди. «Билумбәрг гезити» ниң хәвәр қилишичә, америкиниң хитайға қолланған бу җаза тәдбириниң тәсири аллиқачан көрүлүшкә башлиған.

Бүгүн хитай йүәниниң қиммити 2015-йилидики хитай пул-муамилә базирида көрүлгән кризистин буянқи әң төвән сәвийәгә чүшүп қалған. Йүәнниң давамлиқ чүшиши йәнә башқа кризисларға йол ачидиған болғачқа, көзәткүчиләр хитай мәркизий банкиси бәлким бәзи тәдбирләрни елишқа мәҗбур болуши мумкин дәп қаримақтикән.

«Биломбәрг гезити» ниң хәвиридә ейтилишичә, америкиниң хитай маллириға қойған җаза тәдбири дәл хитайниң иқтисадий зорийиш сүрити аллиқачан астилап қалған бир мәзгилдә болған болғачқа, бу хитай иқтисадиға берилгән иккинчи бир зәрбә болған. Болупму хитайдики оттура вә кичик типлиқ карханилар мәһсутлирини експорт қилидиған базарни дәрһал башқа дөләтләргә йөткийәлмигәнлики вә нормалдикидин ешип кәткән чиқимни чоң типлиқ шеркәтләрдәк асан һәл қилалмиғанлиқи үчүн әң көп зәрбигә учриған. юқиридики бу амиллар хитайниң кейинки йерим йиллиқ иқтисадий өсүш рәқәмлиридә техиму рошән ипадилинидикән.

Мақалидә көрситилишичә, бәзи көзәткүчиләр хитай дөләт рәиси ши җинпиңниң бу әһвалларни нәзәрдә тутуп, үзәңгидин чүшүшкә мәҗбур болуши мумкинликини мөлчәрлимәктә.

Америка президенти доналд трамп өткән пәйшәнбә күни таможна беҗини йәнә давамлиқ өстүрүп, 500 милярд долларға чиқириши мумкинликини җакарлиғандин кейин хитай қаттиқ нарази болған иди. Бүгүн хитайниң муавин сода министири ваң шоен «дуня сода тәшкилати» да сөз қилип «америка бизниң бешимизға тапанча тәңләп турувалди. Америка буни бикар қилип сода урушини аяғлаштуруш үчүн иҗабий қәдәм елиши керәк,» дегән.

Пикирләр (0)
Share
Толуқ бәт