Amérika-xitay soda urushi netijiside yüenning qimmiti eng töwen orun'gha chüshüp qalghan

Muxbirimiz irade
2018-07-12
Élxet
Pikir
Share
Print

Tramp hökümiti xitaygha qoyghan 30 milyard dollarliq chégra béji ötken jüme küni ishqa kirishken idi. "Bilumberg géziti" ning xewer qilishiche, amérikining xitaygha qollan'ghan bu jaza tedbirining tesiri alliqachan körülüshke bashlighan.

Bügün xitay yüenining qimmiti 2015-yilidiki xitay pul-mu'amile bazirida körülgen krizistin buyanqi eng töwen sewiyege chüshüp qalghan. Yüenning dawamliq chüshishi yene bashqa krizislargha yol achidighan bolghachqa, közetküchiler xitay merkiziy bankisi belkim bezi tedbirlerni élishqa mejbur bolushi mumkin dep qarimaqtiken.

"Bilomberg géziti" ning xewiride éytilishiche, amérikining xitay mallirigha qoyghan jaza tedbiri del xitayning iqtisadiy zoriyish sür'iti alliqachan astilap qalghan bir mezgilde bolghan bolghachqa, bu xitay iqtisadigha bérilgen ikkinchi bir zerbe bolghan. Bolupmu xitaydiki ottura we kichik tipliq karxanilar mehsutlirini éksport qilidighan bazarni derhal bashqa döletlerge yötkiyelmigenliki we normaldikidin éship ketken chiqimni chong tipliq shérketlerdek asan hel qilalmighanliqi üchün eng köp zerbige uchrighan. Yuqiridiki bu amillar xitayning kéyinki yérim yilliq iqtisadiy ösüsh reqemliride téximu roshen ipadilinidiken.

Maqalide körsitilishiche, bezi közetküchiler xitay dölet re'isi shi jinpingning bu ehwallarni nezerde tutup, üzenggidin chüshüshke mejbur bolushi mumkinlikini mölcherlimekte.

Amérika prézidénti donald tramp ötken peyshenbe küni tamozhna béjini yene dawamliq östürüp, 500 milyard dollargha chiqirishi mumkinlikini jakarlighandin kéyin xitay qattiq narazi bolghan idi. Bügün xitayning mu'awin soda ministiri wang sho'én "Dunya soda teshkilati" da söz qilip "Amérika bizning béshimizgha tapancha tenglep turuwaldi. Amérika buni bikar qilip soda urushini ayaghlashturush üchün ijabiy qedem élishi kérek," dégen.

Toluq bet